প্ৰেমৰ শক্তি অপাৰ। সঁচা প্ৰেমে কেতিয়াও চল-চাতুৰি প্ৰৱঞ্চনাক প্ৰশ্ৰয় নিদিয়ে।
দেখিবলৈ কুৰূপ যুৱকৰ সৈতেও সুন্দৰী যুৱতীৰ মনে মিলি যাব পাৰে।
ধনী ঘৰত ৰাজকুমাৰীৰ দৰে জীৱন যাপন কৰা যুৱতীয়েও কোনো দৰিদ্ৰ যুৱকৰ প্ৰেমত পৰি সংসাৰ পাতিব পাৰে।
এনেবোৰ ঘটনা প্ৰায়ে চিনেমাত দেখা যায়। কিন্তু শেহতীয়াকৈ চণ্ডীগড়ৰ এগৰাকী যুৱতীয়ে কেৱল প্ৰেমৰ গৰিমা ৰক্ষা কৰাৰ বাবেই এজন বিশেষ ভাবে সক্ষম যুৱকৰ সৈতে বিয়াত বহি আদৰ্শ গঢ়িছে।
চণ্ডীগড়ৰ যুৱতী অনামিকাৰ প্ৰেমৰ সম্পৰ্ক গঢ় লৈছিল চুবুৰীৰে ৰাহুল নামৰ যুৱক জনৰ সৈতে। ২৯ বছৰীয়া ৰাহুলৰ সৈতে শৈশৱৰে পৰা গঢ় লোৱা প্ৰেমক অতি গুৰুত্ব সহকাৰে গ্ৰহণ কৰিছিল অনামিকাই।
কথা আছিল সময়ত দুয়ো সুখৰ সংসাৰ গঢ়িব।কিন্তু নিয়তিয়ে সেয়া হ’বলৈ নিদিলে।২০১৬ চনৰ ১৩ মাৰ্চৰ দিনা ৰাহুল পতিত হয় এক ভয়ংকৰ মটৰ চাইকেল দুৰ্ঘটনাত।
দুৰ্ঘটনাৰ পিছত দুয়োখন ভৰিয়েই অসাৰ হৈ পৰে ৰাহুলৰ। শৰীৰৰ তলৰ অংশ আক্ৰান্ত হয় পক্ষাঘাতত।তেতিয়াৰ পৰাই এখন হুইল চেয়াৰত বহিয়েই দিনৰ পিছত দিন ঘৰৰ ভিতৰতে পাৰ কৰিছে ৰাহুলে।
ৰাহুলৰ আকস্মিক দুৰ্ঘটনাৰ পিছতো শৈশৱৰ প্ৰেমিকা অনামিকাই এৰা নাছিল ৰাহুৰ সংগ।বৰঞ্চ আগতকৈ বেছি সময়হে যুৱতী গৰাকীয়ে ৰাহুলক দিবলৈ ধৰিলে।
ইয়াৰ মাজতে ২০১৮ চনত ৰাহুলৰ সেনা বাহিনীত চাকৰি কৰা পিতৃ বদলি হ’ল কানপুৰলৈ।ৰাহুলহঁত গুচি গ’ল কানপুৰলৈ।
ৰাহুল-অনামিকাৰ মাজত দেখা-দেখি নোহোৱা হৈ পৰিল।হঠাতে কিছুদিন পূৰ্বে অনামিকাই কানপুৰলৈ গৈ ৰাহুলৰ সৈতে বিয়াৰ প্ৰস্তাৱ দিলে।
সেই মৰ্মে কানপুৰৰ ৰিহেব চেণ্টাৰ এটাত ৰাহুল-অনামিকাৰ বিয়া হৈ গ’ল।শৈশৱৰ প্ৰেমক অনামিকাই জনোৱা সন্মানে এতিয়া বহুতকে আনন্দিত কৰি তুলিছে।
