নমতা বিয়া খাবলৈ যোৱাতো বহুতৰে অভ্যাস বুলি ক’লেও হয়তো ভুল কোৱা নহ’ব।
‘থ্ৰি ইডিয়ট’ ছবিতো তিনি বন্ধুৱে কলেজৰ ডিৰেক্টৰৰ ছোৱালীৰ নমতা বিয়া খাবলৈ গৈ কেনে লটিঘটি হৈছিল সেয়া হয়তো ছবি খন চোৱা সকলৰ মনত আছে।
নমতা বিয়ালৈ গৈ পেট পূৰাই খাই গৃহস্থক মাত নিদিয়াকৈয়ে বিয়া ঘৰ ত্যাগ কৰা বহুতেই ধৰা নপৰাকৈ থাকে যদিও সেই সুযোগ এইবাৰ লাভ নকৰিলে এই তিনিজন লোকে।
দিল্লীৰ এখন নমতা বিয়া খাবলৈ যোৱা এই লোক কেইজনে যে কেৱল বিয়া খোৱাতেই ক্ষান্ত থাকে তেনে নহয়।
বিয়াৰ সুস্বাদু আহাৰ পেট পূৰাই খোৱাৰ পিছত এই লোক কেইজনে বিয়া ঘৰৰ মূল্যৱান সামগ্ৰী, উপহাৰ, সোণ আদিও চুৰি কৰি উধাও হয়।
বিয়া ঘৰলৈ সুন্দৰ সাজ পৰিধান কৰি যোৱা এই লোক কেইজনক কোনেও সন্দেহৰ দৃষ্টিৰে নাচায়। ইয়াৰ সুযোগ গ্ৰহণ কৰিয়েই লোক কেইজনে দীৰ্ঘদিন ধৰি দিল্লীকে ধৰি ইয়াৰ কাষৰীয়া অঞ্চলত নমতা বিয়া খোৱাৰ উপৰি বিয়া ঘৰত চুৰি কাণ্ডও সংঘটিত কৰি আহিছে।
চুৰি কাৰ্য সংঘটিত কৰাৰ ক্ষেত্ৰত এই লোক কেইজনে কেইটিমান নাবালককো ব্যৱহাৰ কৰি আহিছে।
শেহতীয়াকৈ দিল্লীৰ নমতা বিয়া এখন খাবলৈ গৈ চুৰি কৰি থাকোতে ধৰা পৰা এই লোক কেইজনৰ ঘৰ মধ্যপ্ৰদেশৰ ৰাজগড় জিলাৰ গুলখৰিত বুলি আৰক্ষীয়ে প্ৰকাশ কৰিছে।
আৰক্ষীৰ মতে নমতা বিয়া খাবলৈ গৈ চুৰি কাৰ্য সংঘটিত কৰাৰ বাবেই এওঁলোকে ‘বেণ্ড বাজা বাৰাত’ নামৰ এটা দল খুলি লৈছে।
দলটোৱে বছৰি ১০-১২ লাখ টকা প্ৰদান কৰাৰ চুক্তিত বহু কেইটি নাবালকক এই কাৰ্যত ব্যৱহাৰ কৰি আহিছে।
আৰক্ষীয়ে দলটোৰ মুঠ পাঁচজন লোকক গ্ৰেপ্তাৰ কৰিছে।
গ্ৰেপ্তাৰ কৰা সকলৰ ভিতৰত দুটি নাবালকো আছে।
