কৰ’নাক লৈ আমেৰিকাৰ কঠোৰ সমালোচনা কৰিছে চীনে। চীনৰ সংবাদপত্ৰ গ্লোবেল টাইমছৰ মতে কৰ’না অতিমাৰীত বিপৰ্যস্ত হৈছে আমেৰিকা। প্ৰতিবেদনত দাবী কৰা মতে আমেৰিকা যুক্তৰাষ্ট্ৰৰ চৰকাৰে কৰ’না বিধি মানি চলাৰ ক্ষেত্ৰত জনসাধাৰণক একত্ৰিত কৰিব পৰা নাই।
চীনৰ সংবাদপত্ৰখনৰ মতে আমেৰিকাই এনে ভয়ংকৰ অপৰাধ কৰিছে যাক ক্ষমা কৰিব নোৱাৰি।
কৰ’নাৰ ফলত আমেৰিকাতে আটাইতকৈ অধিক লোকৰ মৃত্যু ঘটিছে। বৰ্তমানলৈ দেশখনত কৰ’নাৰ ফলত মুঠ ২লাখ ৮৮হাজাৰতকৈয়ো অধিক লোকৰ মৃত্যু হৈছে।
চলিত ডিচেম্বৰ মাহৰ প্ৰথম ৫দিনতে দেশখনত ১০লাখতকৈয়ো অধিক লোক কৰ’নাত আক্ৰান্ত হৈছে। প্ৰতিদিনে ২০০০ৰো অধিক লোকৰ মৃত্যু হৈছে।
গ্লোবেল টাইমছে লিখিছে যে একবিংশ শতিকাত এনেদৰে ইমান লোকৰ মৃত্যু মানৱতাৰ বাবে লজ্জাজনক ঘটনা।
আমেৰিকাত কৰ’না পৰিস্থিতি আৰু অধিক অৱনতি ঘটাৰ আশংকা কৰা হৈছে। চীনৰ কাকতখনে উল্লেখ কৰে যে বিশ্বৰ আটাইতকৈ উন্নত দেশ বুলি কোৱা আমেৰিকা আজি পৃথিৱীৰ ভয়ংকৰ ঠাইলৈ পৰিণত হৈছে। কাকতখনে আমেৰিকাক ‘পৃথিৱীৰ নৰক’ বুলিও অভিহিত কৰিছে।
চীনৰ কাকতখনে লগতে কয় যে বিশ্বৰ অন্যান্য দেশসমূহে এতিয়া সাহস প্ৰদৰ্শন কৰি আমেৰিকাৰ চৰকাৰক মানৱ অধিকাৰ লংঘনৰ সম্পৰ্কত জৱাবদিহি কৰা উচিত। দেশখনে মানৱতাৰ অন্তিম সীমা অতিক্ৰম কৰিছে বুলিও চীনৰ কাকতখনে সমালোচনা কৰে।
