কৰ’না ভাইৰাছৰ সংক্ৰমণ বিয়পি পৰাৰ আশংকাত কৰ’না ভাইৰাছৰ প্ৰতিৰোধ বিধি সকলো স্তৰতে কঠোৰভাৱে পালন কৰিবলৈ তৎপৰতা অৱলম্বন কৰা হৈছে লণ্ডনত। সোমবাৰে দেশখনৰ স্বাস্থ্যমন্ত্ৰীয়ে এই কথা সদৰী কৰে।
যোৱা বুধবাৰৰ পৰাই গোটেই লণ্ডনতে সাৱধানতাৰ দিশত জৰুৰী ব্যৱস্থা আৰম্ভ কৰা হৈছে।
ৰেষ্টুৰেন্ট, পাব তথা আন স্থানসমূহত মানুহৰ সমাৱেশ নিয়ন্ত্ৰণৰ কৰাৰ ব্যৱস্থা গ্ৰহণ কৰা হৈছে। কোনোৱে বিচাৰিলে ৰেষ্টুৰেন্টৰ পৰা খাদ্যবস্তু লৈ যাব পাৰিব। কিন্তু ৰেষ্টুৰেন্টত বহি খোৱা নিষিদ্ধ কৰা হৈছে।
দেশখনৰ স্বাস্থ্য সচিব মেট হেনককে জানিবলৈ দিছে যে দৈনিক সংক্ৰমণৰ হাৰ তথা হাস্পাতলত ভৰ্তি হোৱা ৰোগীৰ সংখ্যা বৃদ্ধি পাইছে।
আনহাতে, কৰ’না ভাইৰাছৰ নতুন ৰূপক লৈয়ো মানুহ আতংকিত হৈ পৰিছে।
স্বাস্থ্য সচিবগৰাকীয়ে জানিবলৈ দিয়ে যে বিজ্ঞানীসকলে ইংলেণ্ডৰ দক্ষিণত কৰ’না ভাইৰাছৰ এটা নতুন ৰূপ ধৰা পেলাইছে যাৰ বাবেই হয়তো এনদৰে সংক্ৰমণ বৃদ্ধি পাইছে।
বুধবাৰৰ পৰা লণ্ডনত ‘টায়াৰ -৩’ আৰম্ভ হৈছে। এতিয়া বাৰ, কাফে খোলা থাকিব যদিও তাত বহি খাব নোৱাৰিব। সেইদৰে স্কুল, চেলুন আদি খোলা ৰাখিব পাৰে।
লণ্ডনত ইতিমধ্যে আক্ৰান্তৰ সংখ্যা ২লাখ অতিক্ৰম কৰিছে আৰু ৭হাজাৰৰো অধিক লোকৰ মৃত্যু ঘটিছে।
