বিহাৰত নীতিশ কুমাৰে বিজেপিৰ সৈতে লগ লাগি চৰকাৰ চলাই আছে। কিন্তু নীতিশক মোক্ষম আঘাত দি অৰুণাচল প্ৰদেশত জনতা দল(য়ুনাইটেড)ৰ ছজন বিধায়কে বিজেপি দলত যোগদান কৰিছে।
অৰুণাচলত জেডি(য়ু)ৰ সাতজন বিধায়ক আছিল যদিও ইয়াৰে ছজনে বিজেপিত যোগ দিয়াত এতিয়া দলটোত থাকিল মাত্ৰ এজনহে বিধায়ক।
৬০ জনীয়া সদস্যৰে গঠিত বিধানসভাত এতিয়া অৰুণাচলৰ পিপলছ পাৰ্টিৰ এজন বিধায়কৰ সৈতে এতিয়া বিজেপিৰ ৪৮ জন সদস্য আছে।
জেডি(য়ু) ত্যাগ কৰা বিধায়ক কেইজন হৈছে ৱে হেং মংফি, জিকে তাকো, ডংৰু ছিয়াংজু, তালিম টবোহ, কাংগং টাকু আৰু ডৰ্জি ৱাংদি খাৰ্মা।
ইয়াৰে তিনিজনক যোৱা মাহত দল-প্ৰতিৰোধী কাৰ্যকলাপৰ বাবে নিলম্বন কৰা হৈছিল।
ৰাজ্যখনৰ বিজেপিৰ ৰাজ্যিক প্ৰধান বায়ৰুম ৱাহগে কয় যে প্ৰধান মন্ত্ৰী আৰু মুখ্য মন্ত্ৰী পেমা খাণ্ডুৰ নেতৃত্বত হোৱা উন্নয়নৰ বাবেই এইদৰে আকৰ্ষিত হৈ দলত যোগদান কৰিছে।
ইফালে দল ত্যাগৰ প্ৰসংগটো নীতিশ কুমাৰে কিদৰে গ্ৰহণ কৰে সেয়া লক্ষ্যণীয় হ’ব। কিয়নো এই সপ্তাহৰ শেষত জে ডি (য়ু)ৰ ৰাষ্ট্ৰীয় পৰিষদৰ দুদিনীয়া বৈঠক আছে।
জে ডি(য়ু) যোৱা বছৰ অৰুণাচল প্ৰদেশত এক স্বীকৃত ৰাজ্যিক দলত পৰিণত হৈছিল।
বিপক্ষৰ শক্তি এতিয়া ১২ খন আসনলৈ হ্ৰাস পালে। ১২ খন আসনৰ ভিতৰত কংগ্ৰেছ আৰু নেশ্যনেল পিপলছ পাৰ্টিৰ চাৰিখন, এখন জে ডি(য়ু) আৰু বাকী তিনিজন নিৰ্দলীয় বিধায়ক।
