দেশজুৰি অব্যাহত আছে ক’ৰ’না ভাইৰাছৰ সংহাৰ। এই জটিল পৰিস্থিতিৰ মাজতে ৰাজস্থানৰ ঝালাবাৰত দেখা দিছে এক নতুন সংকটে।
ঝলাবাৰীৰ ৰাড়ীৰ বালাজী ক্ষেত্ৰত হঠাৎ ৫০টাতকৈও অধিক কাউৰীৰ মৃত্যু ঘটিছে। জিলা প্ৰশাসনৰ তৰফৰ পৰাও কাউৰীৰ অস্বাভাৱিক মৃত্যুৰ কথা নিশ্চিত কৰিছে।
ঝালাবাৰত ইমান সংখ্যক কাউৰীৰ অস্বাভাৱিক মৃত্যুৱে জিলা প্ৰশাসন আৰু স্থানীয় ৰাইজৰ মাজত ভয়ৰ উদ্ৰেগ ঘটিছে।
এই ঘটনাৰ বাবে জিলা প্ৰশাসনে ৰাড়ীৰ বালাজী ক্ষেত্ৰৰ ১ কিলোমিটাৰ পৰিসৰত সান্ধ্য আইন জাৰি কৰিছে। তদুপৰি ৰেপিড ৰেচপন্স টিমো গঠন কৰি দিছে।
এই ঘটনাটো কেনেদৰে সংঘটিত হ’ল তাৰ অনুসন্ধানত এতিয়া নামি পৰিছে জিলা প্ৰশাসন। প্ৰাথমিক তদন্তত এয়া ‘বাৰ্ড ফ্লু’ সংক্ৰমণ বুলিয়েই কৈছে জিলা প্ৰশাসনে।
ইতিমধ্যে ৰেপিড ৰেচপন্স টিমে নমুনা সংগ্ৰহ কৰি তদন্ত আৰম্ভ কৰিছে।
উল্লেখ্য যে যোৱা ২৫ ডিচেম্বৰত মন্দিৰ পৰিসৰত হঠাৎ কাউৰীৰ অস্বাভাৱিক মৃত্যু ঘটে। বন বিভাগ আৰু পশুপালন বিভাগৰ যুটীয়া দলে অসুস্থ কাউৰীৰ চিকিৎসা কৰে আৰু নমুনা ৰাষ্ট্ৰীয় উচ্চ সুৰক্ষা পশুৰোগ সংস্থান ভোপাললৈ প্ৰেৰণ কৰে।
পৰীক্ষাত কাউৰীবোৰত এবিয়েন ইনফ্লুৱেঞ্জাৰ উপস্থিতি নিশ্চিত কৰে। আৰু ইয়াৰ পিছতে জিলা কালেক্টৰ এন গোহাইনে ৰেপিড ৰেচপন্স টিম গঠন কৰি বিষয়টো অনুসন্ধান কৰাৰ নিৰ্দেশ দিয়ে।
