১৮ নহয়, ধূমপানৰ ন্যূনতম বয়স বৃদ্ধি কৰিব চৰকাৰে, কিমান হ’ব বয়স?

ধূমপান ৰোধ কৰাৰ বাবে চৰকাৰে বিভিন্ন ধৰণৰ পদক্ষেপ গ্ৰহণ কৰি আহিছে।

ইয়াৰ ভিতৰত ধূমপানৰ নূন্যতম বয়স বান্ধি দিয়াটোও এটা।

কেন্দ্ৰীয় চৰকাৰে ইমান দিনে দেশত ধূমপানৰ নূন্যতম বয়স ১৮ বছৰত সীমাৱদ্ধ ৰাখিছিল যদিও সেই বয়সৰ সীমাৰ শীঘ্ৰে পৰিৱৰ্তন কৰিবলৈ ওলাইছে।

কেন্দ্ৰীয় চৰকাৰে শেহতীয়াকৈ ধূমপানৰ বয়স সলনি কৰাৰ বাবে বিশেষ তৎপৰতা প্ৰদৰ্শন কৰিছে।

স্বাস্থ্য দপ্তৰৰ এগৰাকী মুখপাত্ৰই প্ৰকাশ কৰা মতে  খুব সোনকালেই চৰকাৰে ধূমপানৰ নূন্যতম বয়স ১৮ বছৰৰ পৰা বৃদ্ধি কৰি ২১ বছৰ কৰিব।

চৰকাৰে সেই মৰ্মে Cigarettes and other Tobacco Products Amendment Act, 2020 ৰ খচৰা প্ৰস্তুত কৰা বুলি তেওঁ প্ৰকাশ কৰে।

নতুন আইন অনুসৰি শীঘ্ৰেই কোনো দোকানতে চিগাৰেট খোলা অৱস্থাত বিক্ৰী কৰিব পৰা নাযাব। অৰ্থাৎ চিগাৰেট, বিড়ি আদি পেকেট হিচাপতহে বেচিব পাৰিব।

ৰাজহুৱা স্থানত ধূমপান কৰিলে পূৰ্বে ২০০ টকা জৰিমনা বিহা হৈছিল যদিও নতুন আইন খন কাৰ্যকৰী হ’লে জৰিমনাৰ পৰিমাণ ২০০০ টকা হ’ব বুলি মুখপাত্ৰ গৰাকীয়ে প্ৰকাশ কৰে।

এই আইন খনে দেশত নৱপ্ৰজন্মৰ মাজত ধূমপানৰ প্ৰতি থকা আসক্তি বহু পৰিমাণে দূৰ কৰিবলৈ সক্ষম হ’ব বুলি ধাৰণা কৰা হৈছে।