প্ৰায় পাঁচশ লোকৰ উপস্থিতিত ধুমধামেৰে বিয়া পাতিলে এজন যুৱকে। তাকো এজনী নহয়, দুজনীকৈ যুৱতীক। যুৱতী দুজনী হেনো তেওঁৰ প্ৰেমিকা।
এই ঘটনা ছত্তীশগড়ৰ মাওবাদী অধ্যুষিত বস্তাৰ জিলাৰ। বিয়াত পৰিয়ালৰ লোকৰ উপৰি গাওঁবাসীও উপস্থিত আছিল। যুৱকজনৰ কীৰ্তি দেখি সকলোৱে অবাক।
চন্দু মৌৰ্য নামৰ যুৱকজনে দুয়োজনী যুৱতীক ভাল পাইছিল। সেয়ে তেওঁ কাকো এৰিব নোৱাৰে। অৱশেষত দুয়োজনীকে একেলগে বিয়া কৰাৰ সিদ্ধান্ত লয়।
চন্দুৱে জানিবলৈ দিয়া মতে দুয়োজনীয়েই একেলগে তেওঁৰ সৈতে আজীৱন কটাবলৈ ৰাজী আছে। সেয়ে, দুজনী পত্নীক লৈ এক সুখী বিবাহিত জীৱনৰ বাবে আশাবাদী ২৪ বছৰীয়া যুৱক চন্দু।
কিন্তু দুজনী যুৱতীয়েই কেনেকৈ চন্দুৰ প্ৰেমত পৰিল? সেয়াও এক কাহিনী।
এবাৰ বস্তাৰৰ টোকপাল অঞ্লত এটা ইলেকট্ৰিকৰ খুটা বহুৱাব গৈছিল চন্দু। তাতেই ২১ বছৰীয়া সুন্দৰী কাশ্যপৰ প্ৰেমত পৰে দিন হাজিৰা তথা কৃষি কৰ্মত জড়িত যুৱক চন্দু। দুয়োজনেই বিয়া কৰাৰো সিদ্ধান্ত লয়।
ইয়াৰ এবছৰ নৌহওতেই চন্দুৰ গাঁৱৰে এখন বিবাহ অনুষ্ঠানত হাছিনা বাঘেল নামৰ ২০বছৰীয়া যুৱতীৰ সৈতে চন্দুৰ প্ৰেম গঢ়ি উছে। চন্দুৱে হাছিনাকো এৰিব নোৱাৰা হ’ল।
চন্দুৱে দাবী কৰা মতে তেওঁৰ প্ৰেমিকা থকাৰ কথা জানিও হাছিনাই তেওঁৰ সৈতে সম্পৰ্ক গঢ়িব বিচাৰে। ইয়াৰ পাছতে চন্দুৱে তেওঁৰ দুয়োজনী প্ৰেমিকাৰ মাজত চিনাকি-পৰিচয় কৰাই দিয়ে।
এতিয়া তিনিও চন্দুৰ ঘৰত তেওঁৰ পৰিয়ালৰ সৈতে থকাৰ সিদ্ধান্ত গ্ৰহণ কৰিছে। অৱশ্যে, বিয়াত হাছিনাৰ পৰিয়ালৰ লোক উপস্থিত থকাৰ বিপৰীতে সুন্দৰীৰ ফালৰ পৰা কোনো উপস্থিত নাছিল।
যোৱা ৫ জানুৱাৰিত সম্পূৰ্ণ সামাজিক ৰীতি-নীতিৰে তিনিজনৰে বিয়া সম্পন্ন হৈ যায়। বিয়াৰ ভিডিঅ’ আৰু নিমন্ত্ৰণী পত্ৰ ছচিয়েল মিডিয়াত ভাইৰেল হৈ পৰিছে।
