আমেৰিকাত ট্ৰাম্প ৰাজৰ অৱসান ঘটাই জো বিদেনে দেশ খনৰ নতুন ৰাষ্ট্ৰপতি হিচাবে শপতগ্ৰহণ কৰিছে।
ডোনাল্ড ট্ৰাম্প মাৰ্কিন ৰাষ্ট্ৰপতি হৈ থকাৰ সময়ত ভাৰতৰ সৈতে খুব এটা ভাল সম্পৰ্ক বজাই ৰখা বুলি ক’ব নোৱাৰি।
বিশেষকৈ বাণিজ্য চুক্তিক কেন্দ্ৰ কৰি ভাৰতৰ সৈতে ট্ৰাম্পে অহি-নকুল সম্পৰ্ক গঢ়ি তুলিছিল।
ইয়াৰোপৰি অনুপ্ৰৱেশৰ অপৰাধত ট্ৰাম্পে বহু ভাৰতীয়ক যমৰ যাতনা ভোগাইছিল।
ভাৰতীয় লোকক ভিছা প্ৰদানৰ ক্ষেত্ৰতো ট্ৰাম্পে গ্ৰহণ কৰিছিল কঠোৰ স্থিতি।
এতিয়া ট্ৰাম্প ৰাষ্ট্ৰপতি হৈ থকা নাই।
ৰাষ্ট্ৰপতিৰ আসনত বহিছে জো বিদেন।
কিন্তু ট্ৰাম্পে ভাৰতৰ প্ৰতি গ্ৰহণ কৰা কঠোৰ স্থিতিকেই বিদেনেও গ্ৰহণ কৰিব নেকি সেই প্ৰশ্নই এতিয়া বহুতৰে মনত ক্ৰিয়া কৰিছে।
এনে সময়তে আজি হোৱাইট হাউচৰ মুখপাত্ৰ জেন ছাকিয়ে ভাৰত-মাৰ্কিন সম্পৰ্ক সন্দৰ্ভত সাংবাদিকে সোধা প্ৰশ্নৰ উত্তৰত কয় যে ভাৰতৰ সৈতে বিদেনে আৰম্ভনিৰে পৰাই সু-সম্পৰ্ক বজাই ৰাখিব।
ভাৰতৰ প্ৰতি মাৰ্কিন ৰাষ্ট্ৰপতি গৰাকীয়ে সদয় আৰু উদাৰ দৃষ্টিভংগী গ্ৰহণ কৰাৰ কথাও তেওঁ উল্লেখ কৰে। বিদেনে ইতিমধ্যে ভাৰতলৈ আহি গৈছে।
অৱশ্যে মোদী প্ৰধানমন্ত্ৰী হৈ থকা সময়ত তেওঁ ভাৰতলৈ অহা নাই।
বিদেনে শেষবাৰৰ বাবে ভাৰতলৈ আহিছিল ২০১৩ চনত।
মাৰ্কিন উপ-ৰাষ্ট্ৰপতি কমলা হেৰিছৰো ভাৰতৰ প্ৰতি এক বিশেষ প্ৰীতি থকাৰ কথা হোৱাইট হাউচৰ মুখপাত্ৰগৰাকীয়ে প্ৰকাশ কৰে।
ইপিনে ৰাষ্ট্ৰপতিৰ আসনত বহাৰ পিছতে বিদেনে বিশ্বৰ বচা বচা দেশৰ ৰাষ্ট্ৰ নেতালৈ ফোন কৰা আৰম্ভ কৰিছে। বিদেনে প্ৰথমে ফোন কৰে ফ্ৰান্সৰ ৰাষ্ট্ৰপতি ইমানুৱেল মেক্ৰনলৈ।
বিদেনে মোদীলৈ ফোন কৰা নকৰাৰ ওপৰতো দেশ দুখনৰ ভৱিষ্যত সম্পৰ্ক ভালেখিনি নিৰ্ভৰ কৰা বুলি বহুতে মন্তব্য কৰিছে।
