জনসাধাৰণৰ বাবে ৬ ফেব্ৰুৱাৰিৰ পৰা পুনৰ মুকলি হ’ব ৰাষ্ট্ৰপতি ভৱন।
কোভিডৰ সংক্ৰমণৰ বাবে বিগত ১০ মাহৰো অধিক কাল বন্ধ হৈ থকাৰ পাছত পুনৰ দৰ্শনাৰ্থীৰ বাবে ৰাষ্ট্ৰপতি ভৱন মুকলি কৰি দিয়াৰ সিদ্ধান্ত গ্ৰহণ কৰা হয়।
চৰাকী বন্ধৰ বাদে শনিবাৰ আৰু দেওবাৰে ৰাষ্ট্ৰপতি ভৱন খোলা থাকিব।
বিভাগীয় ৱেবচাইটত প্ৰকাশ পোৱা অনুসৰি দৰ্শনাৰ্থীয়ে ৰাষ্ট্ৰপতি ভৱন দৰ্শন কৰাৰ উদ্দেশ্যে ৫০ টকা ব্যয়েৰে অনলাইন বুকিং কৰিব লাগিব।
‘‘সামাজিক দূৰত্ব বজাই ৰখাৰ ক্ষেত্ৰত সুবিধা হোৱাকৈ ৰাষ্ট্ৰপতি ভৱন দৰ্শনৰ ১০.৩০ বজা, ১২.৩০ বজা আৰু ২.৩০ বজাৰ প্ৰৱেশৰ সময়ত মাত্ৰ ২৫ গৰাকীকৈহে দৰ্শনাৰ্থীক প্ৰৱেশ কৰিব দিয়া হ’ব,’’ বিভাগীয় ৱেবচাইটত এইদৰে প্ৰকাশ পায়।
কোভিডৰ সংক্ৰমণৰ পৰিপ্ৰেক্ষিতত ঐতিহাসিক ৰাষ্ট্ৰপতি ভৱন বিগত বৰ্ষৰ মাৰ্চৰ ১৩ তাৰিখৰ পৰা বন্ধ ৰখা হৈছিল।
আনহাতে, বৰ্তমান সময়ত ৰাষ্ট্ৰপতি ভৱন দৰ্শন কৰিবলগীয়া লোক সকলে মাস্ক পৰিধান কৰা, সামাজিক দূৰত্ব মানি চলাকে ধৰি সকলো কোভিড প্ৰট’কল মানি চলিব লাগিব।
ৰাষ্ট্ৰপতি ভৱনৰ উপৰিও ৰাষ্ট্ৰপতি ভৱনৰ মোগল গাৰ্ডেনো ৬ ফেব্ৰুৱাৰিৰ পৰা সাধাৰণ দৰ্শনাৰ্থীৰ বাবে মুকলি কৰি দিয়া হ’ব।
ৰাতিপুৱা ১০ বজাৰ পৰা আবেলি ৪ বজালৈ ছয় ঘণ্টাৰ বাবে সাধাৰণ নাগৰিকৰ বাবে মোগল গাৰ্ডেন মুকলি কৰি দিয়া হ’ব।
সুৰক্ষাৰ প্ৰতি লক্ষ্য ৰাখি ৰাষ্ট্ৰপতি ভৱন দৰ্শনৰ সময়ত মোবাইল, বেগ, পানীৰ বটল ইত্যাদি সামগ্ৰী দৰ্শনাৰ্থীয়ে ভিতৰলৈ লৈ যাব নোৱাৰিব বুলিও নিৰ্দেশনাটোত উল্লেখ কৰা হৈছে।
