মঙলবাৰে পুৱাই অভিনেতা মিঠুন চক্ৰৱৰ্তীৰ মুম্বাইৰ ঘৰত উপস্থিত হয় আৰ এছ এছ প্ৰধান মোহন ভাগৱত।
সন্মুখত পশ্চিমবংগৰ বিধানসভাৰ নিৰ্বাচন আৰু ইয়াৰ পূৰ্বে এইদৰে মোহন ভাগৱত আৰু মিথুন চক্ৰৱৰ্তীৰ সাক্ষাতকলৈ ৰাজনৈতিক মহলত বিভিন্ন জল্পনা-কল্পনাৰ সৃষ্টি হৈছে।
ৰাতিপুৱা ৯বজাতে মিঠুনৰ মুম্বাইৰ বাসভৱনত গৈ উপস্থিত হয় মোহন ভাগৱত। তাত অভিনেতাগৰাকীৰ সৈতে দীঘলীয়া বৈঠকত বহে ভাগৱত।
বৈঠকত কি বিষয়ে আলোচনা হৈছে সেই বিষয়ে কোনো কথা সদৰী কৰিব বিচৰা নাই মোহন ভাগৱতে। অৱশ্যে, মিঠুনৰ মতে সেয়া এক আধ্যাত্মিক আলোচনা আছিল।
পশ্চিমবংগত মিঠুন চক্ৰৱৰ্তী এতিয়াও জনপ্ৰিয়। ৰাজনৈতিক মহলে বংগৰ নিৰ্বাচনৰ পূৰ্বে এই বৈঠক গুৰুত্বপূৰ্ণ বুলিয়েই অনুমান কৰিছে। অৱশ্যে, ইয়াৰ পূৰ্বেও ২০১৯চনৰ অক্টোবৰত নাগপুৰত মোহন ভাগৱতক সাক্ষাৎ কৰিছিল মিথুন চক্ৰৱৰ্তীয়ে।
মিথুন চক্ৰৱৰ্তীয়ে শাসকীয় তৃণমূল কংগ্ৰেছৰ ৰাজ্যসভাৰ সাংসদ পদৰ পৰা ২০১৬চনত পদত্যাগ কৰিছিল।
ইয়াৰ পাছত তেওঁ কোনো ৰাজনৈতিক দলৰ সৈতে জড়িত হৈ পৰা নাই মিথুন চক্ৰৱৰ্তী। কিন্তু পশ্চিমবংগৰ নিৰ্বাচনৰ ঠিক আগে আগে এইদৰে আৰ এছ এছ প্ৰধান মোহন ভাগৱতৰ সৈতে বৈঠকে মিথুনৰ নতুন ৰাজনৈতিক ইনিংছৰ সম্ভাৱনাৰ ইংগিত বুলি ভাৱে একাংশ ৰাজনৈতিক মহলে।
পশ্চিমবংগত বিজেপিয়ে শাসন-ক্ষমতা লাভৰ বাবে সৰ্বোপৰি চেষ্টা অব্যাহত ৰাখিছে। প্ৰধানমন্ত্ৰী মোদী, গৃহমন্ত্ৰী আমিত শ্বাহ, দলৰ ৰাষ্ট্ৰীয় সভাপতি জে পি নাড্ডাকে ধৰি বিজেপিৰ শীৰ্ষ নেতৃত্বই সঘনে ৰাজ্যখন ভ্ৰমণ কৰিছে।
কিন্তু মমতা বেনাৰ্জীৰ শক্তিশালী দুৰ্গ ভেদ কৰি ৰাজপাট অধিকাৰ কৰাৰ যুঁজখন সিমান সহজ নহয় বুলি বিজেপিয়ে ভালদৰে অনুভৱ কৰিছে।
সৌৰভ গাংগুলীক লৈ বিজেপিয়ে কিবা পৰিকল্পনা কৰিছিল যদিও সেয়া সম্ভৱ হৈ নুঠিল বংগৰ জনপ্ৰিয় ক্ৰিকেটাৰগৰাকী অসুস্থ হৈ পৰাৰ পাছত।
বিজেপিক বৰ্তমান এনে এখন জনপ্ৰিয় মুখ লাগে যাক লৈ তেওঁলোকে ৰাজ্যখনৰ জনসাধাৰণৰ মাজত সোমাবলৈ সহজ হয়। এইক্ষেত্ৰত জনপ্ৰিয় অভিনেতা মিথুন চক্ৰৱৰ্তী শক্তিশালী বিকল্প হ’ব পাৰে। সেয়েহে, ‘মিথুনদা-ভাগৱতৰ বৈঠকে’ বহু জল্পনাৰ অৱকাশ এৰি থৈ গৈছে।
