“মাজুলীত দ্বিতীয়বাৰৰ বাবে একেখন দলঙৰ আধাশিলা স্থাপন কৰিলে বিজেপি চৰকাৰে। চৰকাৰে দিয়া মিছা প্ৰতিশ্ৰুতি আৰু তেওঁলোকৰ মুখাবোৰ খুলি পৰিছে।”
আজি গুৱাহাটীৰ হোটেল লিলিত এক সংবাদমেল আয়োজন কৰি ৰাজ্যসভাৰ সাংসদ তথা আঞ্চলিক গণ মৰ্চাৰ সভাপতি অজিত কুমাৰ ভূঞাই এই মন্তব্য প্ৰকাশ কৰে।
তেওঁ পুনৰ কয় “এইখন চৰকাৰে দলঙৰ ৰাজনীতি, ৰঙা স্কুটিৰ ৰাজনীতি, প্ৰতিশ্ৰুতিৰ ৰাজনীতি, আধাৰশিলাৰ ৰাজনীতি আৰু এনে নানা ধৰণৰ ৰাজনীতিৰে অসমৰ পৰিবেশ সলনি কৰি পেলাইছে।”
“চৰকাৰী ধনেৰে ৰাজনীতি চলাইছে। বহু কোটি কোটি টকা খৰচ কৰি মিটিঙলৈ মানুহ আনিছে, পেপাৰ টেলিভিছনত বিজ্ঞাপন প্ৰকাশ কৰিছে। কিন্তু বিৰোধী দলৰ কোনো প্ৰশ্নৰ উত্তৰ নাই এই চৰকাৰৰ হাতত। মোদী দুবাৰকৈ অসমলৈ আহি বিৰোধীয়ে কৰা এটা প্ৰশ্নৰো উত্তৰ নিদিলে,”-ক্ষোভ প্ৰকাশ কৰি অজিত ভূঞাই এইদৰে কয়।
ইপিনে, এইখন বিজেপি চৰকাৰে বহু প্ৰতিশ্ৰুতিৰে অসমৰ ৰাইজৰ মন ভুলাবলৈ চেষ্টা কৰি আছে বুলি দাবী কৰে ভূঞাই।
