বিজেপিয়ে ইতিমধ্যে আৰম্ভ কৰিছে হাইভল্টেজ ডিজিটেল কেম্পেইন কিন্তু বহু পূৰ্বৰ প্ৰতিশ্ৰুতি পূৰণত একেবাৰে ব্যৰ্থ বিজেপি চৰকাৰ!
তথাপি বিজেপিয়ে বিভিন্ন পন্থা অৱলম্বন কৰি চলাইছে হাইভল্টেজ কেম্পেইন। ইতিমধ্যে, প্ৰচাৰৰ নামত কোটি কোটি টকা শৰাধ কৰা বুলি বিজেপিৰ বিৰুদ্ধে অভিযোগ উত্থাপন কৰিছে বিৰোধী শিবিৰে।
২০২১ ৰ বিধানসভা নিৰ্বাচনলৈ প্ৰায় ১ টা মাহ থকাৰ তেনে সময়তে বিজেপিৰ প্ৰচাৰৰ ক্ষেত্ৰত যথেষ্ট ব্যয়বহুলতা প্ৰদৰ্শন কৰা পৰিলক্ষিত হৈছে।
ছ’চিয়েল মেডিয়াত বিজেপিয়ে যিদৰে তেওঁলোকৰ আঁচনিসমূহক লৈ প্ৰচাৰ চলাইছে বা পেপাৰ, টেলিভিছন আৰু বিভিন্ন ৱেব পৰ্টেলত প্ৰচাৰ চলোৱাৰ সমান্তৰালকৈ গাঁৱে ভুঞে প্ৰচাৰৰ ক্ষেত্ৰত বিজেপিয়ে ব্যৱহাৰ কৰিছে ভিডিঅ’ ভেন।
বিজেপিয়ে প্ৰচাৰৰ নামত ব্যৱহাৰ কৰা ভিডিঅ’ ভেন যেন একপ্ৰকাৰৰ হাই কেম্পেইন মেটেৰিয়েল হিচাপে পৰিগণিত হৈছে। এই ভিডিঅ’ ভেনত সংযুক্ত থাকে আয়তাকাৰ LED টিভি। টাটা AC আৰু ট্ৰাকত সংলগ্ন এই LED টেলিভিছনৰ দৈৰ্ঘ্য-প্ৰস্থ সুকীয়া। টাটা AC ৰ ক্ষেত্ৰত LED টেলিভিচনৰ দৈৰ্ঘ্য ৪ ফুট আৰু প্ৰস্থ ৬ ফুট। ঠিক সেইদৰে ট্ৰাকৰ ক্ষেত্ৰত দৈৰ্ঘ্য ৮ ফুট আৰু প্ৰস্থ ১২ ফুট। এই ভিডিঅ’ ভেন পৰিচালনা কৰাৰ বাবদ নিয়োগ কৰা হৈছে দুই-তিনিজনকৈ লোক।
তাৎপৰ্য্যপূৰ্ণভাৱে অসমত বিজেপিয়ে প্ৰচাৰৰ বাবে এনে ভিডিঅ’ ভেন আনিছে এশখন। যোৱা ২৭ জানুৱাৰীত মুখ্যমন্ত্ৰী সৰ্বানন্দ সোণোৱাল আৰু ৰাজ্যিক বিজেপিৰ সভাপতি ৰঞ্জিত দাসে উদ্বোধন কৰিছিল এই ভিডিঅ’ভেনৰ শুভাৰম্ভ। বিজেপিৰ ৰাজ্যিক নেতৃত্বৰ দাবী ‘বিশ্বৰ সৰ্ববৃহৎ সংগঠন হিচাপে বিজেপিয়ে চলাব পাৰে এনে প্ৰচাৰ।‘
নিজে স্বীকাৰ নকৰিলেও ব্যয়বহুল প্ৰচাৰ চলোৱা বিজেপিৰ এগৰাকী নেতা পবিত্ৰ মাৰ্ঘেৰিটাই কয় ‘সমগ্ৰ অসমৰ বিভিন্ন প্ৰান্তত ১০০ খন বাহন ঘুৰি প্ৰচাৰ চলাই আছে। এয়া অতি সামান্য খৰচ। এই ভেনসমূহ নিৰ্বাচন হোৱা স্থানলৈ যায়। এই ভেনসমূহ পূৰ্বতে বিহাৰত আছিল, এতিয়া অসমত আছে তাৰ পাছত পশ্চিমবংগ আৰু ত্ৰিপুৰালৈ যাব। এয়া নিৰবিচ্ছিন্ন ধাৰাবাহিক প্ৰক্ৰিয়া। বেলেগৰ সাংগঠনিক শক্তি নাই নোৱাৰে, বিশ্বৰ সৰ্ববৃহৎ সংগঠন হিচাপে আমাৰ সাংগঠনিক শক্তি আছে বাবে পাৰিছো। দলৰ শক্তি থকাৰ বাবে বাজেটৰ কথা নাহে।‘
ইয়াৰোপৰি, ভিডিঅ’ ভেনৰ উপৰিও কি কি হাই কেম্পেইন মেটেৰিয়েল ব্যৱহাৰ কৰা হৈছে বুলি প্ৰশ্ন কৰাত তেওঁ কয় ‘সদায় আধুনিক হৈ থকা বাতৰি কাকত, ৰেডিঅ’, চেটেলাইট চেনেল, পোনপটীয়া প্ৰচাৰৰ বাবে ভিডিঅ’ ভেন, সাংস্কৃতিক অনুষ্ঠান, ছ’চিয়েল মেডিয়াৰ আটাইকেইটা প্লেটফৰ্ম।‘
বিজেপিৰ মুখপাত্ৰ তথা নিৰ্বাচনী প্ৰচাৰ কমিটিৰ আহ্বায়কৰ দায়িত্বত থকা পবিত্ৰ মাৰ্ঘেৰিটাৰ দাবী ‘ৰাজ্য চৰকাৰৰ সকলো উন্নয়নমূলক কাম ৰাইজৰ মাজলৈ নিছে এই ভিডিঅ’ ভেনে।
কিন্তু প্ৰকৃতাৰ্থত অসমৰ সৰ্বাঙ্গীন দিশত উন্নয়ন হৈছে নে?
বিজেপিয়ে ডিজিটেলী প্ৰচাৰৰ নামত কোটি কোটি টকা শৰাধ কৰাতকৈ সেয়া নিবনুৱা সংস্থাপন নাইবা অন্যান্য সৰ্বাঙ্গীন উন্নয়নত গুৰুত্ব দিব নোৱাৰে নেকি? এই প্ৰশ্ন অসম জাতীয় পৰিষদৰ। অসম জাতীয় পৰিষদৰ মতে ‘AJP ৰ উত্থানত শংকিত হৈ বিজেপিয়ে চলাইছে হাইভল্টেজ কেম্পেইন’।
এই সন্দৰ্ভত অসম জাতীয় পৰিষদৰ মুখ্য আহ্বায়ক ড০ বসন্ত ডেকাই কয়, ‘বিজেপিয়ে দাবী কৰি আছে যে তেওঁলোকৰ ১ কোটি হিতাধিকাৰী আছে আৰু আটাইবোৰে বিজেপিক ভোট দিব। তেন্তে তেওঁলোকে প্ৰচাৰ নকৰি ঘৰত বহি থাকিলেও ভোট লাভ কৰিব। তেওঁলোকে অসম জাতীয় পৰিষদৰ উত্থানত ভয় খাইছে। মানুহৰ মাজত চিন্তাৰ পৰিৱৰ্তন হৈছে। এইবাৰ সকলোৱে পৰিৱৰ্তন নহয় পৰিত্ৰাণহে বিচাৰিছে।‘
ইপিনে, নিৰ্বাচনৰ পূৰ্বে দিয়া প্ৰতিশ্ৰুতি পূৰণত ব্যৰ্থ হোৱাৰ বাবেই বিজেপিয়ে এতিয়া যেন ডিজিটেল প্ৰচাৰৰ জৰিয়তে ঢাক-ঢোল কোবোৱা আৰম্ভ কৰিছে বুলি সদৰী কৰে আঞ্চলিক গণ মৰ্চাৰ নেতা অজিত ভুঞাই।
তেওঁৰ মতে ‘প্ৰচাৰ যন্ত্ৰ ব্যৱহাৰত পাকৈত বিজেপি’
সেয়েহে প্ৰচাৰত হাই কেম্পেইন মেটেৰিয়েল ব্যৱহাৰতকৈ গাঁৱে ভুঞে ডিজিটেল ব্যৱস্থা শক্তিশালী কৰাত গুৰুত্ব আৰোপ কৰিবলৈ আহ্বান আঞ্চলিক গণ মৰ্চাৰ সভাপতি অজিত ভুঞাৰ।
ডিজিটেলী প্ৰচাৰৰ জৰিয়তে যিদৰে ৰাইজৰ মাজত সোমাবলৈ বিজেপিয়ে চেষ্টা চলাইছে ঠিক সেইদৰে প্ৰকৃতাৰ্থত এই পাঁচ বছৰে নিবনুৱাক চাকৰি নাইবা অন্য জনকল্যাণমূলক কাম-কাজত গুৰুত্ব দিব লাগিছিল শাসনাধীষ্ঠ চৰকাৰখনে। তেতিয়া এনেদৰে হাই ভল্টেজ প্ৰচাৰ নকৰাকৈ নিশ্চয়কৈ তেওঁলোকক ৰাইজে আঁকোৱালি ল’লেহেঁতেন বুলি সচেতন মহলত চৰ্চা চলিছে।
