ৰাষ্ট্ৰপতি ৰামনাথ কোবিন্দে আজি নতুন দিল্লীৰ আৰ্মি ৰেফাৰেল হাস্পতালত কোভিডৰ ভেকচিন গ্ৰহণ কৰে।
ৰাষ্ট্ৰপতি কোবিন্দে আজি তেওঁৰ কন্যাৰ সৈতে চিকিৎসালয় খনলৈ গৈছিল।
ভেকচিন গ্ৰহণৰ পিছতে তেওঁ চিকিৎসালয় খনৰ চিকিৎসক, নাৰ্চ আৰু অন্যান্য কৰ্মচাৰীসকলক ধন্যবাদ জ্ঞাপন কৰে।
উল্লেখ্য দেশত ১ মাৰ্চৰ পৰা ৬০ বছৰৰ উৰ্দ্ধৰ ব্যক্তিসকলৰ কোভিড ভেকচিন প্ৰদানৰ কাম আৰম্ভ হৈছে।
১ মাৰ্চৰ পুৱাই প্ৰধানমন্ত্ৰী নৰেন্দ্ৰ মোদীয়েও নতুন দিল্লীৰ এইমছত কোভিড ভেকচিন গ্ৰহণ কৰে।মোদীয় ভেকচিন গ্ৰহণ কৰাৰ কথা টুইটাৰ যোগে ৰাজহুৱা কৰিছে।
তেওঁ দেশবাসীক নিৰ্ভয়ে কোভিড ভেকচিন গ্ৰহণ কৰাৰ আহ্বান জনাইছিল।টুইটাৰত মোদীয়ে লিখিছে—‘ মই ভেকচিন লোৱাৰ যোগ্য সকলো লোককে কোভিডৰ ভেকচিন গ্ৰহণ কৰি দেশক কোভিড মুক্ত কৰি তুলিবলৈ আহ্বান জনাইছো’।
ইপিনে ১ মাৰ্চৰ পুৱা ৯ বজাৰ পৰা ভেকচিন গ্ৰহণৰ বাবে ইচ্ছুক লোকসলৰ নাম পঞ্জীয়নৰ কাম আৰম্ভ হৈছে।
www.cowin.gov.in ৱেৱচাইটলৈ গৈ কোভিড ভেকচিন গ্ৰহণ কৰিব বিচৰাসকলে নিজৰ নাম পঞ্জীয়ন কৰোৱাব পাৰিব।
উল্লেখ্য কোভিডৰ ভেকচিন এতিয়াৰে পৰা ব্যক্তিগত খণ্ডৰ চিকিৎসালয় সমূহতো উপলব্ধ হৈছে ।
ব্যক্তিগত খণ্ডৰ চিকিৎসালয়ে ভেকচিন গ্ৰহণ কৰিবলৈ যোৱা লোকৰ পৰা ইচ্ছামতে ল’ব নোৱাৰিব ধন। কেন্দ্ৰীয় চৰকাৰে কোভিডৰ ভেকচিন যাতে সকলোৱে বহন যোগ্য দামত গ্ৰহণ কৰিব পাৰে সেই বিষয়ত অধিক গুৰুত্ব আৰোপ কৰিছে।
শেহতীয়াকৈ কেন্দ্ৰীয় চৰকাৰে ব্যক্তিগত খণ্ডৰ চিকিৎসালয়ৰ বাবে একোটা কোভিডৰ ভেকচিনৰ মূল্য নিৰ্দ্ধাৰণ কৰি দিছে ২৫০ টকাকৈ।
কোনো ব্যক্তিগত খণ্ডৰ চিকিৎসালয়ে কোভিডৰ ভেকচিনৰ নামত ২৫০ টকাতকৈ অধিক ধন ল’ব নোৱাৰিব বুলি কেন্দ্ৰীয় চৰকাৰে স্পষ্ট কৰি দিছে।
