বিশ্বৰ অন্যতম আগশাৰী ৰাষ্ট্ৰ জাপানত এতিয়াও সমলিংগ বিবাহ অবৈধ। এখন আদালতে প্ৰদান কৰা এক ঐতিহাসিক ৰায়ে সমলিংগ বিবাহ অস্বীকৃতিৰ ক্ষেত্ৰত জাপানত এক নতুন আশাৰ সঞ্চাৰ কৰিছে।
জাপানৰ এখন আদালতে ৰায় দিছে যে সমলিংগ বিবাহৰ অনুমতি নিদিয়াটো অসাংবিধানিক। এই গুৰুত্বপূৰ্ণ সিদ্ধান্তই দেশখনত সমলিংগ বিবাহ স্বীকৃতিৰ যুঁজত এক নতুন যুগৰ সৃষ্টি কৰিব পাৰে বুলি ধাৰণা কৰা হৈছে।
আনহাতে জাপানৰ ইতিহাসত পোন প্ৰথমবাৰৰ বাবে এখন আদালতে জাপানত সমলিংগৰ বিবাহৰ সাংবিধানিক বৈধতাৰ ওপৰত ৰায় প্ৰদান কৰিছে।
জি৭ দেশৰ ভিতৰত জাপানেই একমাত্ৰ দেশ যিখন দেশে এতিয়াও সমলিংগৰ বিবাহক স্বীকৃতি দিয়া নাই।
উল্লেখ্য যে ২০১৯ চনতে জাপানৰ এখন আদালতত সমলিংগ বিবাহকেন্দ্ৰিক এটা গোচৰ ৰুজু কৰা হৈছিল। হোক্কাইডো প্ৰিফাৰ্কচৰ তিনি দম্পতীয়ে চৰকাৰে সমলিংগৰ বিবাহৰ অনুমতি নিদিয়াৰ ফলত হোৱা মানসিক ক্ষতিৰ বাবে প্ৰতিটো ক্ষতিৰ বাবদ ১ নিযুত ইয়েন (প্ৰায় ৯,১৬০ ডলাৰ) দাবী কৰি এটা গোচৰ ৰুজু কৰিছিল।
ইফালে জাপানে দেশজুৰি সমলিংগৰ বিবাহক স্বীকৃতি প্ৰদান কৰা নাই যদিও দেশখনৰ কিছু অংশত “অংশীদাৰিত্ব প্ৰমাণপত্ৰ” জাৰী কৰি সমলিংগৰ দম্পতীসকলক কিছুমান অধিকাৰ প্ৰদান কৰি আহিছে।
ইয়াৰ মাজৰে চাপোৰো জিলাৰ হোক্কাইডোৰ আদালতৰ ন্যায়াধীশে বুধবাৰে সমলিংগ বিবাহক জাপান চৰকাৰে স্বীকৃতিৰ প্ৰদান নকৰাটোক অসংবিধানিক বুলি উল্লেখ কৰি দেশৰ সকলো নাগৰিকৰ বাবে সমান আইনৰ প্ৰয়োজন বুলি ৰায় প্ৰদান কৰিছে।
অৱশ্যে আদালতে সমলিংগ বিবাহ স্বীকৃতিৰ সমৰ্থন মত প্ৰদান কৰিলে সমলিংগ দম্পতীসকলক ক্ষতিপূৰণ দিয়াটো খাৰিজ কৰিছে।
সমলিংগ বিবাহক জাপান চৰকাৰে স্বীকৃতি প্ৰাদন নকৰাৰ ফলত প্ৰচিলত আইনে সমলিংগ দম্পতীসকলৰ সাংবিধানিক অধিকাৰ ভংগ কৰি আহিছে বুলি দাবী কৰি আহিছে সমলিংগ বিবাহৰ সমৰ্থককলে। ইয়াৰ মাজত এই গোচৰ দিয়া তিনি সমলিংগ দম্পতীও অন্যতম। তেওঁলোকে দেশখনত সাংবিধানিক অধিকাৰ আৰু সুবিধা প্ৰদানৰ বাবেও দাবী জনাই আহিছে।
“আজিৰ সিদ্ধান্তই এইটো প্ৰমাণ কৰিলে যে প্ৰকৃততে আমি কিমান অস্তিত্বহীন হৈ আছো।” তাকাশী নামৰ এগৰাকী সমলিংগবাদীয়ে কয়।
“মই এনে এক সমাজ বিচাৰো য’ত যৌন সংখ্যালঘুসকলে ভৱিষ্যতে এনে এটা জীৱন বাচনি কৰি জীয়াই থকাৰ আশা দেখা পায়।” তেওঁ লগতে কয়।
স্মৰ্তব্য যে সমলিংগ বিবাহক বৈধতা প্ৰদান নকৰিলেও জাপানত ১৮৮০ চনতে সমকামী যৌনতাক বৈধতা প্ৰদান কৰা হৈছিল। এইক্ষেত্ৰত এছিয়াৰ আন ৰাষ্ট্ৰসমূহতকৈ জাপান যথেষ্ট উদাৰ।
প্ৰণিধানযোগ্য যে সমলিংগ বিবাহক বৈধতা প্ৰদান কৰা এছিয়াৰ একমাত্ৰ ৰাষ্ট্ৰখন হৈছে টাইৱান।
