অহা ২৭ মাৰ্চৰ পৰা তিনিটা পৰ্যায়ত অনুষ্ঠিত হ’বলগীয়া অসম বিধানসভা নিৰ্বাচন ২০২১ৰ ভোটগ্ৰহণ সমাপ্ত হ’ব অহা ৬ এপ্ৰিলত। আনহাতে ফলাফল ঘোষণা কৰা হ’ব ২ মে’ত।
ইতিমধ্যে নিৰ্বাচনৰ সকলো প্ৰস্তুতি প্ৰায় সম্পূৰ্ণ হৈ উঠিছে আৰু অহা ২৭ মাৰ্চত প্ৰথম পৰ্যায়ৰ ভোটগ্ৰহণেৰে ৰাজ্যখনৰ তিনিটা পৰ্যায়ৰ ভোটগ্ৰহণৰ প্ৰক্ৰিয়া আৰম্ভ হ’ব।
প্ৰথম পৰ্যায়ৰ ভোটগ্ৰহণত ৰাজ্যখনৰ উজনিৰ ১২ খন জিলাৰ ৪৭ টা সমষ্টিৰ ৮১,০৯,৮১৫ গৰাকী ভোটাৰে ২৬৪ গৰাকী প্ৰাৰ্থীৰ ভাগ্য নিৰ্ণয় কৰিব।
আনহাতে ১ এপ্ৰিলত অনুষ্ঠিত হ’বলগীয়া ১৩ খন জিলাৰ ৩৯ টা সমষ্টিৰ ৭৩,৪৪,৬৩১ গৰাকী ভোটাৰে ৩৪৫ গৰাকীৰ প্ৰাৰ্থীৰ ভাগ্য নিৰ্ধাৰণ কৰিব।
৬ এপ্ৰিলত অনুষ্ঠিতব্য তৃতীয় তথা অন্তিম পৰ্যায় ভোটগ্ৰহণত ১২ খন জিলাৰ ৪০ টা সমষ্টিত ৩৩৭ গৰাকীৰ প্ৰাৰ্থীৰ ভাগ্য নিৰ্ণয় কৰিব ৭৯,১৯,৪৪১ গৰাকী ভোটাৰে।
অসম মুখ্য নিৰ্বাচনী বিষয়াই ঘোষণা কৰা মতে অসমৰ ১২৬ টা সমষ্টিত ২,৩৩,৭৪,০৮৭ গৰাকী ভোটাৰ আছে। ইয়াৰে ১,১৮,২৩,২৮৬ গৰাকী পুৰুষ, ১,১৫,৫০,৪০৩ গৰাকী মহিলা আৰু ৩৯৮ গৰাকী তৃতীয় লিংগৰ ভোটাৰ আছে।
ইয়াৰ মাজত ৬৩,০৭৪ গৰাকী চাৰ্ভিছ ভোটাৰো আছে।
অসম মুখ্য নিৰ্বাচনী বিষয়াই ঘোষণা কৰা অনুসৰি ৰাজ্যখনত এইবাৰ ১২,৮১,৯১৮ গৰাকী নতুন আৰু ২,৮৯,৪৭৪ গৰাকী ৮০ বছৰ উৰ্দ্ধৰ ভোটাৰ আছে।
প্ৰথম পৰ্যায়ত ভোটগ্ৰহণ অনুষ্ঠিত হ’বলগীয়া ধেমাজি জিলাৰ জোনাই বিধানসভা সমষ্টিটো হৈছে প্ৰথম পৰ্যায়ৰ সৰ্বাধিক ভোটাৰবিশিষ্ট সমষ্টি। সমষ্টিটোত ৩,১১,৬৬০ গৰাকী ভোটাৰ আৰু ৪৪৯ টা ভোটগ্ৰহণ কেন্দ্ৰ আছে।
দ্বিতীয় পৰ্যায়ৰ সৰ্বাধিক ভোটাৰবিশিষ্ট সমষ্টিটো হৈছে হোজাই। হোজাইত ২,৬৫,৮৮৬ গৰাকী ভোটাৰ থকাৰ বিপৰীতে ভোটগ্ৰহণ কেন্দ্ৰ আছে ৪৪৯ টা।
আনহাতে তৃতীয় পৰ্যায়ৰ সৰ্বাধিক ভোটাৰবিশিষ্ট বিধানসভা সমষ্টিটো হৈছে কামৰূপ মহানগৰ জিলাৰ দিছপুৰ। অসমৰ ভিতৰতে সৰ্বাধিক ভোটাৰবিশিষ্ট সমষ্টিটোৰ ভোটাৰৰ সংখ্যা হৈছে ৪,১১,৬৩৬ গৰাকী আৰু ইয়াত ভোটগ্ৰহণ কেন্দ্ৰ আছে ৬০৭ টা।
উল্লেখ্য যে অসমৰ সৰ্বনিম্ন ভোটাৰবিশিষ্ট বিধানসভা সমষ্টিটো হৈছে শিৱসাগৰ জিআৰ থাওৰা বিধানসভা সমষ্টি। সমষ্টিটোত ১,১৫,৩৬৫ গৰাকী ভোটাৰ আছে।
