কাইলৈ বিধানসভা নিৰ্বাচনৰ প্ৰথম পৰ্যায়ৰ ভোটগ্ৰহণ। ৰাজ্যখনৰ ৪৭টা সমষ্টিত অনুষ্ঠিত হ’ব ভোটগ্ৰহণ।
বিগত সময়ছোৱাত ৰাজ্যখনৰ কা-বিৰোধী স্থিতি গ্ৰহণ কৰি ৰাজপথলৈ ওলাই অহা শিল্পীসকলক লৈ অসমবাসীয়ে যথেষ্ট আশা দেখুৱাইছিল।
কিয়নো তেওঁলোকৰ কথা-বতৰাত আবেগ বিহ্বল আহ্বানবোৰ শুনি অসমীয়া ৰাইজে অনুপ্ৰাণিতও হৈ পৰিছিল। জাতিটোৰ ভাষা-সংস্কৃতি ৰক্ষাৰ নামত এইদৰে ৰাজপথলৈ ওলাই অহা শিল্পীসকলে দৰাচলতে অসমৰ জনসাধাৰণক উদ্বুদ্ধ কৰি তুলিছিল।
কিন্তু সময়ৰ লগে লগে ইয়াৰে বহুতেই চোং সলালে। কিছুমানে আনকি কা-ৰ সপক্ষে মাত মাতিবলৈকো কুণ্ঠাবোধ নকৰা হ’ল।
সেয়া যি নহওক এইবাৰ নিৰ্বাচনৰ সময়ত পুনৰ কা-বিৰোধী স্থিতিৰে অসমবাসীলৈ এক আহ্বান জনাইছে এগৰাকী জনপ্ৰিয় তথা স্পষ্টবাদী শিল্পী মানস ৰবীনে।
নিজৰ ফেচবুক পেজত শিল্পীগৰাকীয়ে লিখিছে,’’কা আমি নামানো বুলি সকলোৱে চিঞৰিলো, বহুতেই পিঠিত কোব খালোঁ, পাঁচজন শ্বহীদ হ’ল। তথাপি আমাৰ কথা নুশুনা এখন চৰকাৰ পুনৰবাৰ ক্ষমতালৈ আহিব খুজিছে, জয়ী হ’লেই কা বলবৎ কৰিম বুলি দম্ভালি মাৰিবলৈ লৈছে আৰু আমি কি মনে মনে বহি থাকিম !! নাথাকো ;কাইলৈ আমাৰ হাতৰ আঙুলিত সেই সুবৰ্ণ সুযোগ।‘’
নিজৰ মত স্পষ্ট ৰূপত প্ৰকাশ কৰি শিল্পী মানস ৰবীনে লগতে লিখিছে, ‘’সদ্যহতে আমি এখন কা-বিৰোধী চৰকাৰ বিচাৰিবলৈ বাধ্য,বাকী কথা পাছত। এখন তালিকা প্ৰস্তুত কৰিছোঁ… কাক আমি ভোট দিয়া উচিত আৰু আমাৰ মতে এখেত সকলৰেই জয়ৰ সম্ভাবনা সকলোতকৈ অধিক। এতিয়া আপোনালোকেও পঢ়ি চাওক; ৰাতিটো চিন্তা কৰক; সিদ্ধান্ত লওক, সমষ্টিগত আৰু দলীয় চিন্তাৰ ঊৰ্ধ্বলৈ গৈ এখন কা-বিৰোধী চৰকাৰ প্ৰতিষ্ঠাত এক বলিষ্ঠ ভূমিকা পালন কৰক।‘’
শিল্পীগৰাকীয়ে লগতে প্ৰথম পৰ্যায়ৰ ৪৭ টা সমষ্টিৰ ভিতৰৰ কেইটামান সমষ্টিত কা-বিৰোধী প্ৰাৰ্থী বিজয়ী হ’লেই দিছপুৰত এখন কা-বিৰোধী চৰকাৰ প্ৰতিষ্ঠা হ’ব বুলি আশাবাদী। সেই মতে তেওঁ দাঙি ধৰা তালিকাখন হ’লঃ-
শদিয়া : জগদীশ ভূঞা, দুলীয়াজান : লুৰীণ জ্যোতি গগৈ, নাজিৰা : দেৱব্ৰত শইকীয়া, শিৱসাগৰ : অখিল গগৈ, আমগুৰি : অংকিতা দত্ত, টিয়ক : পল্লৱী শইকীয়া গগৈ, নগাওঁ : শান্তনু শৰ্মা, ধেমাজি : চিত্তৰঞ্জন বসুমতাৰী, লখিমপুৰ : জয়প্ৰকাশ দাস, বিহপুৰীয়া : ভূপেন বৰা, গহপুৰ : ৰিপুন বৰা, চাবুৱা : অজয় ফুকন, তিতাবৰ : ভাস্কৰ জ্যোতি বৰুৱা, সৰুপথাৰ : ৰাজু ফুকন, মৰাণ : সঞ্জীৱ চাংমাই, বোকাখাত : প্ৰণব দলে, থাওৰা : সুশান্ত বৰগোঁহাই, মৰিয়নি : ৰূপজ্যোতি কুৰ্মী আৰু খুমটাই : বিস্মিতা গগৈ।
