আজি অসম বিধানসভাৰ নিৰ্বাচনৰ তৃতীয় পৰ্যায়ৰ ৪০টা সমষ্টিত ভোটগ্ৰহণ অনুষ্ঠিত হৈছে।
ৰাজ্যখনৰ আন সমষ্টিৰ লগতে দিছপুৰ সমষ্টিতো পুৱা ৭ বজাৰ পৰা বিভিন্ন ভোটগ্ৰহণ কেন্দ্ৰত ভোটদান প্ৰক্ৰিয়া আৰম্ভ হয়।
দিছপুৰ সমষ্টিৰ অন্তৰ্গত পাঞ্জাৱৰিস্থিত বাঘৰবৰী প্ৰাথমিক বিদ্যালয়ৰ ভোটগ্ৰহণ কেন্দ্ৰত ভোটদান কৰে দিছপুৰৰ বিধায়ক তথা বিজেপি প্ৰাৰ্থী অতুল বৰাই।
ভোটদান কৰিবলৈ আহি দিছপুৰ সমষ্টিৰ বিজেপি প্ৰাৰ্থী অতুল বৰাৰ সংবাদ মাধ্যমত প্ৰতিক্ৰিয়া ব্যক্ত কৰি কয় যে তেওঁ ২ লাখ ভোটৰ ব্যৱধানত জয়ী হ’ব বুলি দৃঢ় বিশ্বাসী।
তেওঁৰ মূল প্ৰতিদ্বন্দ্বী নাই বুলি দাবী কৰি প্ৰতিদ্বন্দ্বী নিমিত্ত মাথোঁ বুলি সদৰী কৰে।
এইবাৰ সমষ্টিটোত ৯০ শতাংশ ভোটদানেই তেওঁৰ পক্ষত যাব বুলি বিশ্বাসী অতুল বৰা।
আনহাতে, ভোট দিবলৈ আহি চৰকাৰ নোহোৱাতে তেওঁ মন্ত্ৰিত্বৰ দাবীদাৰ বুলি দাবী কৰে অতুল বৰাই। তেওঁ বাধা দিয়াৰ বাবে ৰাইজে ৫ বছৰে ক্ষোভ নোজাৰিলে বুলি জানিবলৈ দি এইবাৰ ৰাইজক মন্ত্ৰিত্ব নাপালে ক্ষোভ উজাৰিবলৈ বাধা নিদিয়ে বুলি কয়।
তদুপৰি, নিজৰ সমষ্টি বেলেগক এৰি নিদিয়ে অতুল বৰাই। ২৬’ তো তেওঁ দিছপুৰৰ পৰা নিৰ্বাচন খেলাৰ আশা প্ৰকাশ কৰে।
উল্লেখ্য বিগত পাঁচ বছৰত দিছপুৰৰ বিধায়কগৰাকীয়ে মন্ত্ৰিত্বৰ বাবে চেষ্টা কৰিও বিমুখ হোৱাৰ বাবে বহুসময়ত নিজৰেই চৰকাৰখনৰ বিৰুদ্ধে মুকলিকৈ কিছুমান মন্তব্য কৰিছিল।
কিন্তু এইবাৰ ভোটদানৰ দিনাই নিজৰ আকাংখিত মন্ত্ৰিত্বৰ দাবী তুলি বিধায়কগৰাকীয়ে একপ্ৰকাৰ ‘ৰাম নৌপজতেই ৰামায়ণ’ লিখাৰ প্ৰয়াস কৰে।
