কামৰূপ মহানগৰ জিলাত কোভিডৰ সংক্ৰমণ যথেষ্ট পৰিমাণে বৃদ্ধি হৈছে। যোৱা ২৮ এপ্ৰিলৰ পৰা ৪ মে’লৈকে ৯০২১ গৰাকী লোক কামৰূপ মহানগৰ জিলাত ক’ৰ’নাত আক্ৰান্ত হৈছিল বুলি এক সংবাদমেলত ঘোষণা কৰে কামৰূপ মহানগৰ জিলা উপায়ুক্তই।
তেওঁ জনোৱা অনুসৰি কামৰূপ মহানগৰ জিলাৰ ৬ টা জ’নৰ পঞ্চম জ’নত আটাইতকৈ বেছি ক’ৰ’ণাৰ সংক্ৰমণ হৈছে। যোৱা এসপ্তাহত ২১৯০ গৰাকী লোক এই জ’নত কোভিডত আক্ৰান্ত হৈছে।
জ’ন ১ ত আছে ১২৫০ গৰাকী কোভিড আক্ৰান্ত। জ’ন ৩টো ১০০৫ টা কোভিড কেচ আছে।
৪০০ তকৈ অধিক কোভিড ৰোগী চিনাক্ত হোৱা ৱাৰ্ডত কন্টেইনমেন্ট জ’ন হিচাপে ঘোষণা কৰা হ’ব বুলি তেওঁ উল্লেখ কৰে।
তলত উল্লেখ কৰা অঞ্চল সমূহত আজিৰে পৰা কন্টেইনমেন্ট জ’ন ঘোষণা কৰা হৈছে বুলি তেওঁ জনায়। তলত সেইখিনি অ-সম্পাদিতৰূপত দাঙি ধৰা হ’ল :
- জ’ন ৫ ৰ ২৮ নম্বৰ ৱাৰ্ডত অধিক সংক্ৰমণ হৈছে। বেলতলা, বশিষ্ট, মৈদাম, বৰ মতৰীয়া আৰু হাতীগাওঁৰ কিছু অংশত সৰ্বাধিক লোক ক’ৰ’নাত আক্ৰান্ত হৈছে।
- জ’ন ৬ ৰ ১৬ নম্বৰ ৱাৰ্ডত ৫০৯ গৰাকী লোক ক’ভিডত আক্ৰান্ত হৈছে। ২৮ নম্বৰ ৱাৰ্ডত ৭৪৩ গৰাকী লোক কোভিডত আক্ৰান্ত হৈছে।
- ১৬ নম্বৰ ৱাৰ্ডত ফটাশিল, ভাস্কৰনগৰ, বৰ্ষাপাৰা আৰু ধীৰেণপাৰা অঞ্চল কন্টেইনমেন্ট জ’ন ঘোষণা কৰা হৈছে।
- জ’ন ১ৰ ৭ নম্বৰত ৱাৰ্ডত ৪১৫ গৰাকী লোক কোভিডত আক্ৰান্ত হৈছে। সেয়েহে এই ৱাৰ্ডতো কন্টেইমেন্ট জ’ন হিচাপে ঘোষণা কৰা হৈছে। ভূতনাথ, কুমাৰপাৰা, এ.টি. ৰোড, আঠগাওঁ অঞ্চল এই ৭ নং ৱাৰ্ডৰ অন্তৰ্গত।
- ২৮ নং ৱাৰ্ডৰ বৰসজাই, বশিষ্ট, মৈদান, বৰমতৰীয়া, হাতীগাওঁ অঞ্চলৰ উত্তৰ অংশ অৰ্থাৎ অজন্তা পথৰ পৰা হাতীগাওঁ চাৰিআলি হৈ বশিষ্ট পথ-জংচন ৰোডত কন্টেইমেন্ট জ’ন হিচাপে ঘোষণা কৰা হ’ব। পশ্চিম অংশত বশিষ্ঠ ৰোডৰ পৰা চন্দননগৰ পথলৈকে কন্টেইমেন্ট জ’ন। পূৱ অংশত ৰুক্মিণী বাহিনী নদীৰ পৰা NH37 ব্ৰীজলৈকে কন্টেইমেন্ট জ’ন ঘোষণা।
- ৬ নং ৱাৰ্ডৰ উত্তৰ অংশত এ.কে ডেব ৰোডৰ পৰা ফটাশিল আমবাৰী চাৰিআলিলৈকে আৰু মৰা ভৰলুৰ পৰা লখৰা ৰোডলৈকে কন্টেইনমেন্ট জ’ন ঘোষণা কৰা হ’ব।দক্ষিণে নেতাজী পথৰ পৰা ফটাশিল ব্ৰীজলৈকে আৰু ভৰলুৰ পৰা জি.এছ কলনী ৰোডলৈকে কন্টেইনমেন্ট জ’ন। পশ্চিম অংশত ভৰলু নদীৰ পৰা সোণাৰাম খেলপথাৰলৈকে কন্টেইনমেন্ট জ’ন।
ইপিনে, এই কন্টেইনমেন্ট জ’নৰ বাবে কেতবোৰ নতুন নিৰ্দেশনাৰ কথা উল্লেখ কৰে জিলা উপায়ুক্তগৰাকীয়ে। তলত সেই নিয়ম উল্লেখ কৰা হ’ল :
- এই কন্টেইনমেন্ট জ’নত কোনোধৰণৰ অহা-যোৱা কৰিব নোৱাৰিব। ৰাইজৰ সুবিধাৰ বাবে কিছুমান ৰেহাই থাকিব। জৰুৰীকালীন সেৱা চলি থাকিব, ফাৰ্মাচী, পশুখাদ্য-ঔষধৰ বিপনী খোলা থাকিব।
- চৰকাৰী-বেচৰকাৰী কাৰ্য্যালয়, ব্যৱসায়ী প্ৰতিষ্ঠান আৰু শিক্ষানুষ্ঠান বন্ধ থাকিব। কোভিড প্ৰ’টকল ৰক্ষা কৰি বেংক আৰু এটিএম সেৱা খোলা থাকিব।
- গেলামালৰ দোকান, গাখীৰ আৰু ফল-মূলৰ বিপনী পুৱা ৮ বজাৰ পৰা দুপৰীয়া ১২ বজালৈকে খুলিব পাৰিব। গ্ৰাহক আৰু বিক্ৰেতাই মানি চলিব লাগিব সামাজিক দুৰত্ব। বিক্ৰেতাই হেণ্ড গ্ল’বছ ব্যৱহাৰ কৰিব লাগিব। এটা সময়ত দোকানৰ বাহিৰে-ভিতৰে ৫ জনতকৈ অধিক লোক গোট খোৱাৰ অনুমতি নাই।
