‘ইষ্টাৰ ছানডে’ উপলক্ষে অহা ১ এপ্ৰিলত য়ুনাইটেড খ্ৰীষ্টিয়ান ৱেলফেয়াৰ ছচাইটি অফ ছিকিম (য়ু চি ডব্লিউ এছ এছ) এ গেংটকত এখন ‘ইষ্টাৰ প্ৰেয়াৰ ৰেলী’ৰ আয়োজন কৰিছে।
য়ু চি ডব্লিউ এছ এছএ লগতে ৩১ মাৰ্চত মনন কেন্দ্ৰত প্ৰাক্ ইষ্টাৰ উদযাপনৰ অংশ হিচাপে এখন হিন্দী চলচ্চিত্ৰ ‘বেক টু ডেড’ৰ বিশেষ প্ৰদৰ্শনীৰো আয়োজন কৰিছে।
মঙলবাৰে গেংটকত এখন সংবাদেমলত য়ুচিডব্লিউএছএছৰ সভাপতি এল্ডাৰ পেট্ৰাছ গুৰুঙে জনায় যে শোভাযাত্ৰাটো টাডঙৰ পৰা আৰম্ভ হৈ প্ৰাৰ্থনা আৰু সংগীতৰ মাজেৰে ৰাষ্ট্ৰীয় ঘাইপথেৰে আহি ডেভেলপমেন্ট অঞ্চলৰ বেথেলহেম গীৰ্জাত সামৰণি পৰিব।
‘’শোভযাত্ৰাৰ সময়ত বিভিন্ন গীৰ্জাৰ সদস্যসকলে সমৱেতভাৱে শান্তি, একতা আৰু ৰাজ্যখনৰ জনসাধাৰণৰ লগতে বিশ্ববাসীৰ কল্যাণৰ বাবে প্ৰাৰ্থনা কৰিব,’’-তেওঁ কয়।
তেওঁ লগতে জনায় যে ৰাণীপুলৰ পৰা গেংটকলৈ থকা গীৰ্জাসমূহে এই ‘ইষ্টাৰ প্ৰেয়াৰ ৰেলী’ শোভাযাত্ৰাটোত অংশগ্ৰহণ কৰিব।
গুৰুঙে জনায় যে শোভাযাত্ৰাটো তিনি বছৰৰ বিৰতিৰ পিছত আয়োজন কৰা হৈছে।
অৱশ্যে, তেওঁ জানিবলৈ দিয়ে যে ছচাইটিয়ে যোৱা বছৰৰ প্ৰাৰম্ভতে ইষ্টাৰ ছানডে উপলক্ষে ৰাংপোৰ পৰা গেংটকলৈ এটা মটৰ চাইকেল শোভাযাত্ৰাৰ আয়োজন কৰিছিল আৰু ইষ্টাৰ ছানডে’ত এছটিএমএন হাস্পাতলৰ ২৫৫ গৰাকী ৰোগীৰ মাজত খাদ্যৰ টোপোলা বিতৰণ কৰিছিল।
তেওঁ গেংটকৰ ভিতৰত থকা গীৰ্জাসমূহৰ লগতে ইয়াৰ দাঁতি কাষৰীয়া গীৰ্জাসমূহকো শোভাযাত্ৰাত অংশগ্ৰহণ কৰিবলৈ আহ্বান জনাইছে।
‘বেক টু ডেড’ চলচ্চিত্ৰখনৰ বিশেষ প্ৰদৰ্শনী সম্পৰ্কত গুৰুঙে জনায় যে প্ৰাক্ ইষ্টাৰ উদযাপনৰ বাবে ছচাইটিয়ে এই চলচ্চিত্ৰখনৰ বিশেষ প্ৰদৰ্শনৰ ব্যৱস্থা কৰিছে আৰু লগতে স্থানীয় ৰাইজক ছবিখন চোৱাৰ সুযোগ দিছে কিয়নো ছবিখনত বেছিভাগ স্থানীয় শিল্পীয়ে অভিনয় কৰিছে।
ছবিখনৰ এগৰাকী শিল্পী তথা প্ৰডাকশ্যন মেনেজাৰ তিমথি ৰাইয়ে জনায় যে অলপতে ছবিখনৰ প্ৰথমটো বিশেষ প্ৰদৰ্শনী মুম্বাইত অনুষ্ঠিত হৈছিল আৰু চিত্ৰগৃহত মুক্তি দিয়াৰ আগেয়ে গেংটকত ছবিখনৰএইটো হ’ব মাত্ৰ দ্বিতীয়টো বিশেষ প্ৰদৰ্শনী।
