অহা ১৮জুনৰ পৰা বিশ্ব টেষ্ট চেম্পিয়নশ্বিপৰ ফাইনেল আৰম্ভ হ’ব। তাৰ পূৰ্বেই খেলপথাৰৰ বাহিৰৰ যুঁজত ভাৰতক পিছ পেলালে নিউজিলেণ্ডে।
আইচিচিৰ ৰেংকিং তালিকাৰ শীৰ্ষত নাম সোমালে নিউজিলেণ্ডে। ফলত বিশ্ব টেষ্ট চেম্পিয়নশ্বেপৰ ফাইনেলত বিশ্বৰ এক নম্বৰ দল হিচাপে ভাৰতৰ পৰিৱৰ্তে নামিব নিউজিলেণ্ড।
দেওবাৰে ইংলেণ্ডক তেওঁলোকৰ ঘৰৰ মাটিতে ৮উইকেটত পৰাজিত কৰি ছিৰিজ জয় কৰে নিউজিলেণ্ড।
টেষ্ট ৰেংকিঙৰ তালিকাত নিউজিলেণ্ড এতিয়া ১২৩ পইন্টেৰে শীৰ্ষস্থানত। নিউজিলেণ্ডতকৈ ২পইন্ট পাছত থাকি দ্বিতীয় স্থানত ভাৰত। সেইদৰে, ১০৮ পইন্টেৰে তৃতীয় স্থানত আছে অষ্ট্ৰেলিয়া। ইংলেণ্ডে ১০৭পইন্ট লাভ কৰি তালিকাৰ চতুৰ্থ স্থানত আছে।
নিউজিলেণ্ডে এদিনীয়া ক্ৰিকেটৰ পাছত এইবাৰ টেষ্টতো শীৰ্ষ স্থান লাভ কৰিলে।
ইংলেণ্ডৰ বিৰুদ্ধে খেলা দ্বিতীয়খন টেষ্টৰ দ্বিতীয় ইনিংছত ইংলেণ্ডক ১২২ৰাণত অল আউট কৰে নিউজিলেণ্ডে। নিল ৱেগনাৰ আৰু মেট হেনৰিয়ে ৩টাকৈ উইকেট দখল কৰে।
আনহাতে, নিউজিলেণ্ডে তেওঁলোকৰ ৩৭ৰাণৰ লক্ষ্য মাত্ৰ দুটা উইকেট হেৰুৱাই সম্পূৰ্ণ কৰে। আঘাতৰ বাবে টেষ্টখনত কেন উইলিয়ামছৰ সলনি দলক নেতৃত্ব দিছিল টম লাথামে।
