মৃতকৰ মৃত্যুৰ প্ৰমাণপত্ৰৰ বাবে ৰাতিটো অপেক্ষা কৰিবলগীয়া হ’ল এজন লোকে। আনহাতে, চিকিৎসালয়ৰ মৰণোত্তৰ পৰীক্ষা কৰা কোঠাৰ ভিতৰত চলি থকাৰ অভিযোগ সুৰাৰ পাৰ্টী! এই ঘটনাৰ এটা ভিডিঅ’ সামাজিক মাধ্যমত বিয়পি পৰাৰ পিছতে তীব্ৰ প্ৰতিক্ৰিয়াৰ সৃষ্টি হৈছে মহাৰাষ্ট্ৰত। ঘটনাটোক কেন্দ্ৰ কৰি নিলম্বন কৰা হৈছে এজন চিকিৎসকক। লগতে আৰম্ভ কৰা হৈছে বিভাগীয় তদন্ত।
মহাৰাষ্ট্ৰৰ পিম্পৰি-চিঞ্চৱড়ৰ যশৱন্তৰাও চৱন স্মৃতি চিকিৎসালয়ত সংঘটিত হৈছে এই ঘটনা। সংবাদ প্ৰতিবেদন অনুসৰি, চিকিৎসালয়খনৰ মৰণোত্তৰ পৰীক্ষা বিভাগৰ ভিতৰত সুৰাৰ বটল, গিলাচ, জলপান আৰু খাদ্যৰ প্লেট পৰি থকা দেখা গৈছে ভিডিঅ’টোত। কোঠাটোৰ কাষৰ এটা ছোফাত এজন লোকক শুই থকা অৱস্থাতো দেখা গৈছে।
জানিব পৰা মতে, মৃত্যুৰ প্ৰমাণপত্ৰ সংগ্ৰহ কৰিবলৈ যোৱা এজন লোকে নিশাটো অপেক্ষা কৰাৰ পিছতো প্ৰমাণপত্ৰ লাভ নকৰাত বিভাগটোৰ ভিতৰলৈ গৈছিল। সেই সময়তে তেওঁ ভিডিঅ’টো ৰেকৰ্ড কৰে বুলি প্ৰকাশ পাইছে। ভিডিঅ’টোত তেওঁ শুই থকা ব্যক্তিজনক জগাই প্ৰমাণপত্ৰ আৰু প্ৰয়োজনীয় নথি-পত্ৰৰ বিষয়ে সোধা দেখা যায়। ইয়াৰ পিছতে ঘটনাটো পোহৰলৈ আহে।
ঘটনাৰ সৈতে জড়িত অভিযোগৰ ভিত্তিত পিম্পৰি-চিঞ্চৱড় পৌৰ নিগমৰ আয়ুক্ত বিজয় সূৰ্যবংশীয়ে ১৬ অক্টোবৰত চিকিৎসালয়খনৰ চিকিৎসা বিষয়া ডাঃ বৈভৱ অৱিনাশ মাশ্কেক নিলম্বনৰ নিৰ্দেশ দিয়ে। তেওঁৰ বিৰুদ্ধে বিভাগীয় তদন্তৰো নিৰ্দেশ দিয়া হৈছে। তদন্তৰ অংশ হিচাপে ১৫ দিনৰ ভিতৰত অভিযোগনামা দাখিল কৰিবলৈও সংশ্লিষ্ট বিষয়াসকলক নিৰ্দেশ দিয়া হৈছে বুলি হিন্দুস্তান টাইমছ-এ প্ৰকাশ কৰিছে।
প্ৰাথমিক প্ৰতিবেদন অনুসৰি, ঘটনাটো ২ বা ৩ অক্টোবৰৰ আশে-পাশে সংঘটিত হোৱা বুলি অনুমান কৰা হৈছে। অৱশ্যে, ভিডিঅ’টো ১৬ অক্টোবৰত সামাজিক মাধ্যমত বিয়পি পৰাৰ পিছতহে বিষয়টোৱে ব্যাপক চৰ্চা লাভ কৰে। ভিডিঅ’টোত দেখা সকলো ঘটনাৰ সত্যতা আৰু অভিযোগৰ সম্পূৰ্ণ তথ্য তদন্তৰ জৰিয়তে নিৰ্ধাৰণ কৰা হ’ব।
উল্লেখ্য যে, চিকিৎসালয়ৰ মৰণোত্তৰ পৰীক্ষা বিভাগৰ দৰে সংবেদনশীল স্থানত এনে ঘটনা সংঘটিত হোৱাৰ অভিযোগে চৰকাৰী স্বাস্থ্যসেৱাৰ দায়িত্ববোধ আৰু কৰ্মচাৰীৰ কৰ্তব্যনিষ্ঠাক লৈ গুৰুতৰ প্ৰশ্ন উত্থাপন কৰিছে।
