অসম প্ৰদেশ কংগ্ৰেছৰ পৰা বহিস্কাৰ আৰু বিধায়ক পদ ত্যাগ কৰাৰ পাছত আজি আনুষ্ঠানিকভাৱে বিজেপিত যোগদান কৰে ৰূপজ্যোতি কুৰ্মীয়ে। ধেমাজিৰ গেৰুকামুখত মুখ্যমন্ত্ৰীৰ উপস্থিতিত কুৰ্মীয়ে বিজেপিত যোগদান কৰে।
২০০৬ চনৰ পৰা অসম প্ৰদেশ কংগ্ৰেছৰ হৈ মৰিয়নী সমষ্টিৰ পৰা বিজয়ী হৈ অহা ৰূপজ্যোতি কুৰ্মীয়ে সোমবাৰে গেৰুৱা বসন পৰিধান কৰিলে।
বিজেপিত যোগদান কৰাৰ পাছত কুৰ্মীয়ে কয়,” ২০১৪ চনত কেন্দ্ৰত বিজেপি দলৰ চৰকাৰ হৈছিল আৰু তেতিয়া বিভিন্নজনে সমালোচনা কৰিছিল। আমি বিৰোধী হিচাপে সমালোচনা কৰিছিলোঁ কিন্তু অসমৰ ৰাইজে বিজেপি চৰকাৰৰ কামকাজ দেখিছে আৰু সেইবাবেই অনাগত ভৱিষ্যতৰ কথা চিন্তা কৰি বিজেপি চৰকাৰক ক্ষমতাত বিচাৰিছে।”
“লগতে মইও আজি খুবেই আনন্দ লাভ কৰিছোঁ বিজেপি দলত যোগদান কৰি। মোৰ বিজেপি দলত যোগদান কৰা পলমেই হ’ল’’ বুলিও কুৰ্মীয়ে উল্লেখ কৰে।
কিন্তু কেনেকৈ বোধোদয় ঘটিল ৰূপজ্যোতি কুৰ্মীৰ! তেওঁৰ কথাৰে, ‘’২০১৪ চনত নৰেন্দ্ৰ মোদীৰ নেতৃত্বত চৰকাৰ অহাৰ পাছত আমি বিৰোধী হিচাপে কেৱল নামৰ বাবে সমালোচনা কৰিছিলোঁ। ভাৰতৰ ৰাইজে দেখা পালে ২০১৯ চনত ২০১৪ চনত কৈ অধিক ভোট লাভ কৰি কেন্দ্ৰত নৰেন্দ্ৰ মোদীৰ চৰকাৰ হৈছিল আৰু সেই সময়ত মইও বিৰোধী হিচাপে কেৱল নামত বিজেপি দলক সমালোচনা কৰিছিলোঁ। বিজেপি দলৰ জনপ্ৰিয়তা আৰু মুখ্যমন্ত্ৰী হিমন্ত বিশ্ব শৰ্মাৰ জনপ্ৰিয়তা আৰু কামৰ প্ৰতি আকৃষ্ট হৈ আজি মই বিজেপি দলত যোগদান কৰিছোঁ। মোৰ দৃঢ় বিশ্বাস সভ্যতা ৰক্ষাৰ এই যুঁজত মই কিঞ্চিত বৰঙণি আগবঢ়াব পাৰিম।‘’
নিজৰ নতুন যাত্ৰা সম্পৰ্কত কুৰ্মীয়ে লগতে কয়, ‘’২০১৪ চনলৈ বিজেপিৰ কোনো অস্তিত্ব নাছিল কিন্তু ২০১৪ চনৰ পাছৰ পৰা ৰাইজে বিজেপিৰ কাম দেখিছে আৰু তেওঁলোকে বিজপিক ভোট দি জয়যুক্ত কৰিছে। জ্যোতিষীৰ পৰামৰ্শ অনুসৰি মই বিজেপি দলত যোগদান কৰিলোঁ।‘’
বিজেপিত যোগদান কৰিয়েই কংগ্ৰেছৰ ভুলটো আঙুলিয়াই দিবলৈকো নাপাহৰিলে ন বিজেপি কুৰ্মীয়ে। ক’লে, ‘’কংগ্ৰেছ দলৰ কোনো ভিজন নাই। এ আই উ ডি এফৰ লগত মিত্ৰতা কৰাটো কংগ্ৰেছৰ ডাঙৰ ভুল বুলিও কুৰ্মীয়ে উল্লেখ কৰে।‘’
