ডনাৰ মন্ত্ৰী হিচাবে আজি কাৰ্যভাৰ গ্ৰহণ কৰিব জিকে ৰেড্ডীয়ে

উত্তৰ-পূৰ্বাঞ্চলৰ উন্নয়নৰ সৈতে জৰিত এটি বিশেষ দপ্তৰ হৈছে ডেভেলপমেণ্ট অব নৰ্থ ইষ্টাৰ্ণ ৰিজন চমুকৈ ডনাৰ।

ডনাৰ মন্ত্ৰালয়ৰ মন্ত্ৰী হিচাবে আজি আনুষ্ঠানিক ভাবে কাৰ্যভাৰ গ্ৰহণ কৰিব গংগাপুৰম কিষাণ ৰেড্ডীয়ে।

কালি ৰেড্ডীয়ে মোদী মন্ত্ৰীসভাত এগৰাকী কেবিনেট মন্ত্ৰী হিচাবে শপতগ্ৰহণ কৰিছিল।

তেলুগু লোক অধ্যুষিত দুখন ৰাজ্য ক্ৰমে অন্দ্ৰপ্ৰদেশ আৰু তেলেংগানাৰ পৰা ৰেড্ডীয়েই হৈছে সম্প্ৰসাৰিত মন্ত্ৰীসভাত ঠাই পোৱা একমাত্ৰ মন্ত্ৰী।

তেলেংগানাৰ ছেকেন্দ্ৰাবাদ সমষ্টিৰ পৰা ৰেড্ডীয়ে এইবাৰেই প্ৰথমবাৰ সংসদলৈ নিৰ্বাচিত হৈছে।

Will Be Assuming Charge As The Cabinet Minister For Tourism (9:30AM), Culture (10:00AM) & Development Of North Eastern Region – DoNER (10:30AM), At The Respective Offices Today 8th July, 2021. https://t.co/UGJ5ZqsoEE

— G Kishan Reddy (@kishanreddybjp) July 8, 2021

৬০ বছৰীয়া ৰেড্ডীয়ে তিনিবাৰ বিধায়ক হৈছিল আৰু বিজেপিৰ সৈতে দলটোৰ জন্মৰে পৰা জৰিত হৈ আহিছে। দলৰ হৈ কঠোৰ পৰিশ্ৰম কৰা ৰেড্ডীক প্ৰথমবাৰৰ বাবে সাংসদ নিৰ্বাচিত হোৱাৰ পিছতে মোদী মন্ত্ৰীসভাত অন্তৰ্ভূক্ত কৰা হৈছে।

হায়দৰাবাদৰ চেণ্ট্ৰেল ইনষ্টিটিউট অব টুল ডিজাইনৰ পৰা তেওঁ টুল ডিজাইনৰ ডিপ্ল’মা লাভ কৰিছিল।

২০০৪ চনত তেওঁ প্ৰথমবাৰৰ বাবে হায়দৰাবাদৰ হিমায়াতনগৰ বিধানসভা সমষ্টিৰ পৰা অন্দ্ৰপ্ৰদেশ বিধানসভালৈ নিৰ্বাচিত হৈছিল। সমষ্টি পুনৰ নিৰ্ধাৰণৰ পিছত তেওঁ আম্বৰপেট সমষ্টিৰ পৰা দুবাৰ বিধায়ক নিৰ্বাচিত হৈছিল।

উল্লেখ্য ৰেড্ডীয়ে ডঃ জিতেন্দ্ৰ সিঙৰ ঠাইত নতুন ডনাৰ মন্ত্ৰী হিচাবে কাৰ্যভাৰ গ্ৰহণ কৰিব। ৰেড্ডীৰ পৰা অসম তথা উত্তৰ-পূৰ্বাঞ্চলে যথেষ্ট আশা কৰিছে।

উত্তৰ-পূৰ্বাঞ্চলৰ সৰ্বাংগীন বিকাশৰ ক্ষেত্ৰত ডনাৰ মন্ত্ৰী হিচাবে জিকে ৰেড্ডীয়ে বলিষ্ঠ পদক্ষেপ গ্ৰহণ কৰিবলৈ সক্ষম হ’ব বুলি সকলোৱে আশা কৰিছে।