কাজিৰঙা ৰাষ্ট্ৰীয় উদ্যানৰ জৈৱতন্ত্ৰৰ বাবে ব্ৰহ্মপুত্ৰৰ প্লাৱন অপৰিহাৰ্য ৷
প্ৰতিটো বাৰিষাত ব্ৰহ্মপুত্ৰৰ পানীয়ে পখালি যায় কাজিৰঙাক ৷ বানপানীয়ে ইয়াৰ জৈৱতন্ত্ৰত প্ৰাণৰ সঞ্চাৰ কৰে ৷ নুৱাই ধোৱাই নতুন ৰূপত সজায় তোলে ৷ বানপানী কাজিৰঙাৰ বাবে অত্যন্ত প্ৰয়োজনীয় ৷ কিন্তু এইবাৰ যেন ব্যতিক্ৰম ৷ বাৰিষা যাবৰে হ’ল যদিও প্লাৱিত ন’হব নেকি কাজিৰঙা ?
২০২০ বৰ্ষৰ জুন জুলাই মাহত ব্ৰহ্মপুত্ৰৰ বাঢ়নি পানীয়ে বুৰাই দিছিল ৰাষ্ট্ৰীয় উদ্যান খন ৷ সেই সময়তে ব্ৰহ্মপুত্ৰৰ পানীয়ে ৰাষ্ট্ৰীয় উদ্যানখনৰ ৮০ শতাংশৰো অধিক অঞ্চল প্লাৱিত কৰাৰ লগতে দক্ষিণৰ ৩৭ নং ৰাষ্ট্ৰীয় পথাংশও ঠায়ে ঠায়ে বুৰাই পেলাইছিল ৷ কিন্তু চলিত বৰ্ষৰ জুলাই মাহতো ব্ৰহ্মপুত্ৰই প্লাৱিত কৰিব পৰা নাই কাজিৰঙা ৰাষ্ট্ৰীয় উদ্যানক ৷
সাধাৰণতে কাজিৰঙাৰ পুৱ দিশে থকা ধনশিৰিমুখত ব্ৰহ্মপুত্ৰ নদীৰ জলপৃষ্ঠই বিপদসীমা অতিক্ৰম কৰিলেহে প্লাৱিত হয় কাজিৰঙা ৷ ২০২০ চনৰ মে’ মাহৰ ২৭ তাৰিখৰ বিয়লি ধনশিৰিমুখত ব্ৰহ্মপুত্ৰ নদীয়ে বিপদসীমা অতিক্ৰম কৰিছিল ৷
ইয়াৰ পিচতে ১৯ জুনত দ্বিতীয় বাৰৰ বাবে ধনশিৰিমুখত ব্ৰহ্মপুত্ৰ জলপৃষ্ঠ বিপদ সীমা অতিক্ৰম কৰি ধাৰাবাহিক ভাৱে বাঢ়িবলৈ লৈছিল আৰু জুলাই মাহৰ ১৩ তাৰিখে জলপৃষ্ঠ বিপদসীমাৰ ২.০৬ মিটাৰ ওপৰলৈকে উঠিছিল ৷ যাৰ বাবে কাজিৰঙাৰ প্ৰায় ৮০ শতাংশৰো অধিক অঞ্চল প্লাৱিত হৈছিল ৷
ইয়াৰ বিপৰীতে চলিত বৰ্ষ আজিৰ তাৰিখলৈকে ধনশিৰিমুখত ব্ৰহ্মপুত্ৰৰ জলপৃষ্ঠই বিপদ সীমা অতিক্ৰম কৰিব পৰা নাই ৷ যোৱা ৫ জুলাইত জলপৃষ্ঠ বিপদসীমাৰ ০.০৫ মিটাৰ তললৈকে উঠিছিল যদিও বিপদসীমা অতিক্ৰম কৰিব পৰা নাছিল ৷ আজিৰ তাৰিখত কাজিৰঙা ৰাষ্ট্ৰীয় উদ্যানৰ পুব সীমাৰ ধনশিৰিমুখত আজি বিয়লি ব্ৰহ্মপুত্ৰৰ জলপৃষ্ঠ বিপদ সীমাৰ ০.৮৮ মিটাৰ তলত আছে আৰু পানী কমি আছে ৷
চলিত বৰ্ষৰ ১১ জুন তাৰিখত ব্ৰহ্মপুত্ৰৰ জলপৃষ্ঠ উৰ্ধগামী হোৱাৰ বাবে কাজিৰঙা ৰাষ্ট্ৰীয় উদ্যানৰ বুঢ়াপাহাৰ বনাঞ্চলৰ নামনি অংশত আৰু ১ জুলাই ৰাষ্ট্ৰীয় উদ্যানখনৰ নদীপৰীয়া দ’ অঞ্চলবোৰত প্ৰৱেশ কৰিছিল যদিও আশা কৰা মতে প্লাৱিত নহ’ল কাজিৰঙা ৷
এতিয়া সকলোতে শুকাইছে পানী ৷ যাৰ বাবে চিন্তিত প্ৰকৃতিবিদ ৷ অৱশ্যে জুলাই আৰু আগষ্ট মাহত কাজিৰঙাত পানী হোৱাক লৈ আশাবাদী সকলো ৷
অৱশ্যে কাজিৰঙাত শেহতীয়া বান হোৱাৰো উদাহৰণ নোহোৱা নহয় ৷ ব্ৰহ্মপুত্ৰৰ প্লাৱনে পখলিব নোৱাৰিলে প্ৰভাৱিত হ’ব পাৰে কাজিৰঙাৰ প্লাৱিত উপত্যকাৰ জৈৱতন্ত্ৰ ৷ অৱশ্যে বানপানী আহিলে মোকামিলা কৰিব পৰাকৈ প্ৰস্তুত উদ্যান কৰ্তৃপক্ষ ৷
