বাংলাদেশৰ নাৰায়নগঞ্জৰ ৰূপগঞ্জত সজীৱ গ্ৰুপৰ শাখা প্ৰতিষ্ঠান হাছেম ফুড এণ্ড বিভাৰেজৰ ফুডছ ফেক্টৰীত সংঘটিত এক ভয়ংকৰ অগ্নিকাণ্ডত ৫২জন লোক নিহত হৈছে।
অগ্নিকাণ্ড সংঘটিত হোৱা ভৱনটোৰ প্ৰথমৰ পৰা চতুৰ্থ মহলাৰ ভিতৰৰ পৰা এই মৃতদেহসমূহ উদ্ধাৰ কৰা হৈছে। ভৱনটোৰ পঞ্চম তথা ষষ্ঠ মহলাত উদ্ধাৰ অভিযান চলাই থকা হৈছে আৰু তাতো মৃতদেহ উদ্ধাৰ হোৱাৰ সম্ভাৱনা আছে।
জানিব পৰা মতে, মৃতসকলৰ মাজত বহু শিশু শ্ৰমিকো আছে। উদ্ধাৰ হোৱা মৃতদেহৰ মাজত তালিকা অনুসৰি বহুতৰে বয়স ১৮ বছৰৰ তলত।
হাছেম ফুডছ ফেক্টৰীত চেজান জ্যুচ, চানাচুৰ, চকলেটকে ধৰি বিভিন্ন খাদ্য সামগ্ৰী প্ৰস্তুত কৰা হয়।
বৃহস্পতিবাৰে বিয়লি অগ্নিকাণ্ড সংঘটিত হোৱাৰ সময়ত সেই শ্বিফটত কৰ্মৰত শ্ৰমিকসকলৰ অধিকাংশই প্ৰাণ হেৰুৱায়।
বাতৰি অনুসৰি, এতিয়াও কমেও ৫১জন শ্ৰমিক সন্ধানহীন হৈ আছে। ফায়াৰ চাৰ্ভিছৰ সূত্ৰই জানিবলৈ দিয়া মতে ভৱনটোৰ এটা চিৰি বন্ধ থকাৰ বাবে উদ্ধাৰ কাৰ্যত অসুবিধাৰ সন্মুখীন হ’ব লগা হৈছে অন্যথা বহুকেইজনৰ প্ৰাণ ৰক্ষা কৰিব পৰা গ’লহেঁতেন।
অগ্নিকাণ্ডৰ ঘটনাৰ পাছত বৃহস্পতি নিশা ৩ জনৰ মৃতদেহ উদ্ধাৰ কৰা হয়। শুকুৰবাৰে বিয়লিলৈকে আৰু ৪৯টা মৃতদেহ উদ্ধাৰ কৰাৰ পাছত মৃতকৰ সংখ্যা ৫২জনলৈ বৃদ্ধি পায়।
বাতৰি অনুসৰি, ফেক্টৰীটোৰ ভিতৰত প্ৰচুৰ মিঠাতেল থকাৰ বাবে বেছি সময় ধৰি জুই জ্বলি আছিল বুলি অনুমান কৰা হৈছে। তদুপৰি, তাত প্ৰচুৰ প্লাষ্টিক আৰু কাগজৰ কাৰ্টনো আছিল। উদ্ধাৰ কাৰ্যত নিয়োজিত কেইবাজনো ফায়াৰ চাৰ্ভিছৰ লোকো আহত হৈছে।
বৃহস্পতিবাৰে বিয়লি ৫বজাত অগ্নিকাণ্ড ঘটা হাছেম গ্ৰুপৰ ফেক্টৰীৰ জুই শুকুৰবাৰে দুপৰীয়ালৈকে নিয়ন্ত্ৰণ কৰিব পৰা হোৱা নাছিল।
বাতৰি অনুসৰি, ফেক্টৰীটোৰ সপ্তম মহলাৰ এটা কেমিকেল গুডাউন থকাৰ বাবে অগ্নিকাণ্ডটোৰ ব্যাপকতা অধিক হোৱাৰ অনুমান কৰা হৈছে।
