নিৰ্দিষ্ট প্ৰমানসহ পৰ্ণগ্ৰাফী ছবি নিৰ্মাণৰ অভিযোগত গ্ৰেপ্তাৰ কৰা হৈছে বলীউদৰ মোহময়ী অভিনেত্ৰী শিল্পা ছেট্টিৰ স্বামী ৰাজ কুন্দ্ৰাক।
স্বামীৰ এনে কুকীৰ্তি ফাদিল হোৱাৰ পাছতে শিল্পা ছেট্টিৰ জীৱনলৈ নামি আহিছে পৰিৱৰ্তন। বৰ্তমান হাতত ছবিৰ কাম নাই। ছনী টিভিৰ জনপ্ৰিয় নৃত্যৰ ৰিয়েলিটি শ্ব’ ‘ছুপাৰ ডান্সাৰ’ৰ বিচাৰক হিচাপে যি অলপ অৰ্থ উপাৰ্জন কৰিছিল তাৰো এতিয়া মুধা মৰিল।
উদ্যোগপতি স্বামী ৰাজ কুন্দ্ৰাৰ কীৰ্তিৰ বাবে এতিয়া শিল্পাৰ সেই কামো বন্ধ হোৱাৰ পথত। কিয়নো লজ্জাৰ বাবে মুখ উলিয়াব নোৱাৰা হৈছে শিল্পাই।
বাতৰি অনুসৰি, শিল্পাই এতিয়া পুত্ৰ সন্তানক লৈ নিজৰ ঘৰ এৰি ভনীয়েকৰ ঘৰত আশ্ৰয় লৈছেগৈ।
জানিব পৰা মতে, শিল্পাক বাদ দি কৰিশ্মা কাপুৰক ‘ছুপাৰ ডান্সাৰ’ৰ বিচাৰকৰ দায়িত্ব দিয়াৰ পৰিকল্পনা কৰা হৈছে।
‘ছুপাৰ ডান্সাৰ’ৰ চতুৰ্থ ছিজন চলি আছে আৰু শ্ব’টোৰ প্ৰথম ছিজনৰ আৰম্ভণিৰ পৰাই প্ৰধান বিচাৰক হিচাপে আছিল শিল্পা ছেট্টি। যথেষ্ট জনপ্ৰিয় হৈ পৰা এই শ্ব’টোৱে ইতিমধ্যে দেশজুৰি আকৰ্ষণৰ বিন্দু হৈ পৰিছে।
কিন্তু স্বামীক গ্ৰেপ্তাৰ কৰাৰ পাছৰে পৰা শিল্পা শ্ব’টোৰ শ্বুটিঙ ফ্ল’ৰলৈ অহা নাই। কিছুদিনৰ বাবে হেনো বিৰতি লৈছে অভিনেত্ৰীগৰাকীয়ে।
ইপিনে, শ্ব’টোৰ টিআৰপি ধৰি ৰখাৰ লক্ষ্যৰে কিছুদিনৰ বাবে কৰিশ্মা কাপুৰক শিল্পাৰ স্থানত বিচাৰক হিচাপে অনাৰ সিদ্ধান্ত লোৱা হৈছে।
অৱশ্যে এই বিষয়ত প্ৰযোজক সংস্থাটোৱে এতিয়াও চূড়ান্ত সিদ্ধান্তৰ কথা জানিবলৈ দিয়া নাই।
