গো-সুৰক্ষাৰ বাবে বিজেপিয়ে উত্তৰ প্ৰদেশ অসমকে ধৰি দেশৰ আন কেইবাখনো ৰাজ্যত গো-সুৰক্ষা বিধেয়ক বলৱৎ কৰিবলৈ উঠি-পৰি লগাৰ সময়তে নিজৰ দলৰেই স্থিতিৰ বিৰুদ্ধে গৈছে বিজেপিৰ এগৰাকী মন্ত্ৰীয়ে।
মেঘালয়ৰ বিজেপি দলৰ মন্ত্ৰী ছানবৰ ছুল্লাইয়ে মেঘালয়ৰ জনসাধাৰণক চিকেন, ছাগলীৰ মাংস অথবা মাছৰ তুলনাত গৰুৰ মাংস বেছিকৈ খোৱাৰ বাবে আহ্বান জনাইছে।
মেঘালয়ৰ পশুপালন দপ্তৰৰ মন্ত্ৰী ছুল্লাইয়ে কয় ‘এখন গণতান্ত্ৰিক দেশত মানুহে নিজৰ ইচ্ছানুসৰি খাদ্য গ্ৰহণ কৰাৰ অধিকাৰ আছে। মই সেয়ে চিকেন, ছাগলীৰ মাংস অথবা মাছৰ তুলনাত গৰুৰ মাংস বেছিকৈ খোৱাৰ বাবে জনতাক আহ্বান জনাইছো। মোৰ এই আহ্বানে বিজেপিয়ে গো-হত্যা বন্ধ কৰিবলৈ ওলাইছে বুলি বহুতৰ মনত ঠাই লোৱা ধাৰণাৰ সলনি ঘটাব পাৰিব বুলি মই আশা ৰাখিছো’।
মন্ত্ৰীগৰাকীয়ে লগতে অসমৰ মুখ্যমন্ত্ৰী হিমন্ত বিশ্ব শৰ্মাক মেঘালয়লৈ যাতে গৰুৰ সৰবৰাহ বিঘ্নিত নহয় সেই বিষয়ত গুৰুত্ব দিবলৈ আহ্বান জনায়।
অসম-মেঘালয় সীমা সমস্যাৰ বিষয়ে উল্লেখ কৰি মন্ত্ৰী ছুল্লাইয়ে কয় যে আমি কেৱল আলোচনাৰ নামত চাহ খাই থাকিলেই নহ’ব।
তেওঁ কয় ‘ আমাৰ ঘৰত যদি চোৰে চুৰি কৰিবলৈ আহে তেন্তে আমি হাতসাৱটি বহি থাকিলে নহ’ব। আমি আত্মৰক্ষাৰ বাবে ব্যৱস্থা হাতত ল’ব লাগিব’।
সীমান্তত মিজো আৰক্ষীয়ে অসম আৰক্ষীক গুলীওৱাৰ প্ৰসংগত মন্ত্ৰীগৰাকীয়ে কয় যে মিজোৰাম আৰক্ষীয়ে নিজৰ মাটি আৰু মানুহক ৰক্ষা কৰিবলৈ সাহসী পদক্ষেপ গ্ৰহণ কৰিছে।
মিজোৰাম আৰক্ষীক উচ্চ প্ৰশংসা কৰি বিজেপিৰ মন্ত্ৰীগৰাকীয়ে নিজৰ ৰাজ্য অৰ্থাৎ মেঘালয়ৰ আৰক্ষীক ভয়াতুৰ বুলিও কয়।
তেওঁ কয় যে সীমান্তত মেঘালয়ৰ আৰক্ষীয়ে মাটি আৰু মানুহক ৰক্ষা কৰাৰ সলনি সদায় সাধাৰণ জনতাক আগলৈ ঠেলি দিয়ে আৰু নিজে পিছত অৱস্থান কৰে।
তেওঁ সীমান্ত ৰক্ষাৰ বাবে মেঘালয় আৰক্ষীকো মিজোৰাম আৰক্ষীৰ দৰেই সদায় আগত অৱস্থান কৰিবলৈ কয়।
