বহু বৰেণ্য সাহিত্যিকেৰে ভৰি থকা অসমৰ অনেক পুৰণি সাহিত্যিকৰ সাহিত্য সৃষ্টি এতিয়া বিস্মৃতিৰ গৰাহত পৰাৰ উপক্ৰম ঘটিছে।
এনে সময়তে বৰেণ্য কবি চন্দ্ৰধৰ বৰুৱাৰ জনপ্ৰিয় কবিতা ‘ধূলিকণা মই’ক এক সুমধুৰ গীতৰ ৰূপত সজাই তুলি শ্ৰোতাৰ মাজলৈ লৈ আহিছে জনপ্ৰিয় শিল্পী কুমাৰ ভৱেশে।
কবিগৰাকীৰ প্ৰখ্যাত তথা বহু পঠিত ‘ধূলিকণা মই’ কবিতাটোত সুৰাৰোপ কৰিছে বিশিষ্ট গ্ৰন্থ প্ৰকাশক তথা সংগীতানুৰাগী ব্যক্তি ৰাকেশ গোস্বামীয়ে।
‘ধূলিকণা মই’ গীতটিত কুমাৰ ভৱেশে কণ্ঠদান কৰাৰ উপৰি গীতটিৰ সংগীতো কৰিছে।
কুমাৰ ভৱেশৰ মিৰ্জাস্থিত দেহাজান ষ্টুডিঅ’ত বাণীৱদ্ধ কৰা ‘ধূলিকণা মই’ গীতটি আজি ইউটিউৱত আনুষ্ঠানিক ভাবে মুকলি কৰা হয়।
youtube channelৰ Kumar Bhabesh Musical ত উপলব্ধ হৈছে এই গীতটি।গীতটি সন্দৰ্ভত মন্তব্য কৰি শিল্পী কুমাৰ ভৱেশে কয় —‘ বহুতে সৰুতে বিদ্যালয়ৰ পাঠ্যপুথিত পঢ়া কবি চন্দ্ৰধৰ বৰুৱাৰ ‘ধূলিকণা মই’ কবিতাটিয়ে এতিয়াও অনেকৰ মনত ৰেখাপাত কৰি আছে।গ্ৰন্থ প্ৰকাশক ৰাকেশ গোস্বামীয়ে সুন্দৰ কবিতাটিত সুৰদান কৰাৰ পিছতে মই আন্তৰিকতাৰে গীতটি গোৱাৰ প্ৰয়াস কৰিছো। আশা ৰাখিছো গীতটিক সকলোৱে আদৰি ল’ব’।
