IPL 2021 , চলিত আইপিএল-ৰ দ্বিতীয় পৰ্বত সহজ জয়েৰে অভিযান আৰম্ভ কৰিছে দিল্লী কেপিটেলছে।
আজি প্ৰায় একপক্ষীয় এখন খেলত দিল্লীয়ে ৮ উইকেটত পৰাস্ত কৰে ছানৰাইজাৰ্ছ হাইদৰাবাদক।
খেলখনত পোনতে বেটিং কৰি হাইদৰাবাদে দিল্লীৰ সন্মিলিত বলিং আক্ৰমণত তচনচ্ হৈ নিৰ্ধাৰিত ২০ অভাৰত ন উইকেটৰ বিনিময়ত মাত্ৰ ১৩৪ ৰান সংগ্ৰহ কৰে। দলৰ হৈ সৰ্বাধিক ২৮ ৰানৰ ইনিংছ খেলে আব্দুল চামাদে। ৰছিদ খানে ২২ ৰান সংগ্ৰহ কৰাৰ বিপৰীতে ১৮ ৰানকৈ সংগ্ৰহ কৰে অধিনায়ক চেন উইলিয়ামচন আৰু ৰিদ্ধিমান সাহাই।
খেলখনত শক্তিশালী বলিং প্ৰদৰ্শন দাঙি ধৰা দিল্লী কেপিটেলছৰ হৈ কেগিছো ৰাবাডাই ৩ টা উইকেট আৰু অক্ষৰ পেটেল আৰু এনৰিখে ২ টাকৈ উইকেট দখল কৰে।
আনহাতে ১৩৫ ৰানৰ সহজ লক্ষ্য আগত লৈ ইনিংছ আৰম্ভ কৰা দিল্লীৰ আৰম্ভণিও সন্তোষজনক নাছিল। ২০ ৰানতে দলে পৃথ্বী শ্ব’ৰ ৰূপত প্ৰথমটো উইকেট হেৰুৱাই।
Latest News : Golaghat, অসামৰিক প্ৰতিৰক্ষা বিভাগৰ নৱনিযুক্ত ৱাৰ্ডেনসকলৰ সভা সম্পন্ন
অৱশ্যে ধাৱান,শ্ৰেয়স আয়াৰ আৰু পণ্টৰ ধৈৰ্যশীল বেটিঙৰ সহায়েৰে জয়ৰ লক্ষ্যত উপনীত হয় দিল্লী কেপিটেলছ্। ধাৱানে ৪২ ৰান সংগ্ৰহ কৰি বিদায় লোৱাৰ পৰিৱৰ্তে আয়াৰে ৪৭ ৰান আৰু পণ্টে ৩৫ ৰান সংগ্ৰহ কৰি অপৰাজিত থাকে।
খেলখনত মিতব্যয়ী বলিঙেৰে ৪ অভাৰত মাত্ৰ ১২ ৰান খৰচ কৰি দুই উইকেট দখল কৰা দিল্লী কেপিটেলছৰ বলাৰ এনৰিখ নকিয়াই মেচৰ শ্ৰেষ্ঠ খেলুৱৈৰ সন্মান লাভ কৰে।
উল্লেখ্য যে এই জয়েৰে দিল্লী কেপিটেলছ্ পইন্ট তালিকাৰ শীৰ্ষ স্থানত উপনীত হয়।
আনহাতে ৮ খন খেলৰ ৭ খনতে পৰাজয়বৰণ কৰা ছানৰাইজাৰ্ছ হাইদৰাবাদ তালিকাৰ অন্তিম স্থানত অৱস্থান কৰিছে।
আজি আইপিএল- ৰ অন্য এখন খেলত ডিফেণ্ডিং চেম্পিয়ন মুম্বাই ইণ্ডিয়াঞ্চৰ বিৰুদ্ধে প্ৰতিদ্বন্দীতা আগবঢ়াব কলকাতা নাইট ৰাইডাৰ্ছে।
