শাৰীৰিক সম্পৰ্ক কৰিও প্ৰেমিকাক বিয়া কৰাব নিবিচাৰিলে যুৱকে; আদালতে দিলে এই ৰায়

Refusal to marry no ground for rape: দীৰ্ঘদিনীয়া সম্পৰ্কৰ লগতে শাৰীৰিক সম্পৰ্ক স্থাপন কৰাৰ পাছতো বিয়াৰ বাবে মন সলনি কৰে এক ৩৩বছৰীয়া যুৱকে। তাৰপাছতে তেওঁৰ বিৰুদ্ধে ধৰ্ষণৰ অভিযোগ আনে প্ৰাক্তন প্ৰেমিকাই।

কিন্তু বোম্বে উচ্চ ন্যায়ালয়ৰ ঔৰংগাবাদ বেঞ্চে এইক্ষেত্ৰত এক যুগান্তকাৰী ৰায় দি যুৱকৰ বিৰুদ্ধে অনা ধৰ্ষণৰ অভিযোগ নাকচ কৰি দিছে।

ন্যায়াধীশ সুনীল দেশমুখ আৰু ন্যায়াধীশ নীতিন সূৰ্যবংশীৰ খণ্ড বিচাৰপীঠে চৰকাৰী কৰ্মচাৰী যুৱকৰ বিৰুদ্ধে অনা ধৰ্ষণৰ গোচৰ বাতিল কৰি দিছে।

আদালতৰ পৰ্যবেক্ষণত কোৱা হয় যে বাস্তৱিকতে বিয়াৰ ক্ষেত্ৰত যুৱকজনৰ ইচ্ছা আছিল। খণ্ড বিচাৰপীঠে জনায় যে মন সলনি কৰাৰ বাবে তেওঁ বিয়া কৰিব বিচৰা নাই। গতিকে তেওঁৰ বিৰুদ্ধে ধৰ্ষণৰ গোচৰ কৰিব পৰা নাযায়।

আদালতৰ মতে তদন্তৰ সময়ত যিবোৰ তথ্য পোৱা গৈছে তাৰপৰা দেখা যায় যুৱকজনৰ বিয়া কৰোৱাৰ বাস্তৱিকতে ইচ্ছা আছিল। কিন্তু পাছত মন সলনি হোৱাত তেওঁ বিয়া কৰাবলৈ অস্বীকাৰ কৰে।

ইপিনে, ৩০বছৰীয়া যুৱতীগৰাকীৰ দাবী যে তেওঁলোকৰ মাজত পূৰ্বৰ পৰাই চিনাকি আছিল। ২০১৫চনৰ পৰা তেওঁলোকৰ বন্ধুত্ব আছিল।

কেইমাহমানৰপাছতে তেওঁলোক দুজনে প্ৰেমৰ সম্পৰ্কত জড়িত হৈ পৰে। ইজনে সিজনক সাক্ষাৎ কৰিবলৈ আৰম্ভ কৰে। তাৰপাছত তেওঁলোকৰ মাজত প্ৰায় নিয়মিত শাৰীৰিক সম্পৰ্ক ঘটে।

আনহাতে, যুৱকজনে বিয়া কৰাব বুলিও কথা দিছিল। কিন্তু ২০২০চনৰ ৬এপ্ৰিলৰ পৰা যুৱকজনে মোবাইল বন্ধ কৰি দিয়ে।

ইপিনে, তেওঁৰ পৰিয়ালৰ আগত যেতিয়া বিয়াৰ প্ৰস্তাৱ দিয়া হয় তেতিয়া কৰ’না পৰিস্থিতিৰ অজুহাতত বাৰে বাৰে পিছুৱাই ৰখা হয়। তাৰপাছতে থানাত যুৱকজনৰ বিৰুদ্ধে ধৰ্ষণৰ অভিযোগ কৰা হয়।

আদালতৰ মত হ’ল ইয়াত কোনো মিছা প্ৰতিশ্ৰুতিৰ কথা নাই। দুয়োজনৰে ভালপোৱাৰ মাজতে শাৰীৰিক সম্পৰ্ক গঢ়ি উঠিছিল।