Covid India Update দেশত কৰ’না ভাইৰাছৰ তৃতীয়টো ঢৌৰ আশংকা ক্ৰমাৎ ঘণীভূত হোৱাৰ সময়তে দৈনিক সংক্ৰমণৰ ঘটনা পূৰ্বৰ দিনৰ তুলনাত সামান্য বৃদ্ধি পাইছে। সেইদৰে সক্ৰিয় ৰোগীৰ সংখ্যা হ্ৰাস পাইছে যদিও কৰ’নাত দৈনিক মৃত্যুৰ সংখ্যা বৃদ্ধি পোৱাটোৱে উদ্বেগৰ সৃষ্টি কৰিছে।
শনিবাৰে কেন্দ্ৰীয় স্বাস্থ্য মন্ত্ৰ্যালয়ে প্ৰকাশ কৰা তথ্য অনুসৰি যোৱা ২৪ ঘণ্টাত দেশত মুঠ ক’ৰ’নাত আক্ৰান্ত হৈছে ১৬ হাজাৰ ৩২৬ জন লোক।
আনহাতে, যোৱা ২৪ ঘণ্টাত দেশত ৬৬৬ জন কোভিড আক্ৰান্ত লোকৰ মৃত্যু হৈছে। উৎসৱৰ বতৰত হঠাতে এইদৰে মৃত্যুৰ সংখ্যা বৃদ্ধি স্বাভাৱিকতে চিন্তাৰ বিষয়।
মন্ত্ৰ্যালয়ে প্ৰকাশ কৰা অনুসৰি দেশত মুঠ কৰ’না আক্ৰান্ত মৃত্যুৰ সংখ্যা হৈছেগৈ ৪লাখ ৫৩ হাজাৰ ৭০৮জন।
যোৱা ২৪ ঘন্টাত দেশত কৰ’নাৰ পৰা আৰোগ্য লাভ কৰি ঘৰলৈ ওভতা মুঠ ৰোগীৰ সংখ্যা হৈছে ১৭হাজাৰ ৬৭৭জন।
দেশত বৰ্তমানলৈকে মুঠ কৰ’নাৰ পৰা আৰোগ্য লাভ কৰা ৰোগীৰ সংখ্যা হৈছে ৩ কোটি ৩৫লাখ ৩২হাজাৰ ১২৬জন।
আনহাতে, দেশত চিকিৎসাধীন হৈ থকা কৰ’না ৰোগীৰ সংখ্যা হৈছে ১লাখ ৭৩হাজাৰ ৭২৮জন।
বৰ্তমানলৈ দেশত ১০১ কোটি ৩০ লাখ ২৮ হাজাৰ ৪১১জন লোকক কৰ’নাৰ ভেকচিন প্ৰদান কৰা হৈছে। ইয়াৰ ভিতৰত যোৱা ২৪ ঘন্টাত ৬৮লাখ ৪৮হাজাৰৰো অধিক লোকক ভেকচিন দিয়া হৈছে।
সেইদৰে, যোৱা ২৪ঘন্টাত দেশত ১৩লাখ ৬৪হাজাৰ ৬৮১জন লোকৰ নমুনা পৰীক্ষা কৰা হৈছে।
দেশত কৰ’নাৰ তৃতীয়টো ঢৌৰ আশংকাক আগত ৰাখি দেশবাসীক কোভিড বিধি মানি চলিবলৈ বাৰম্বাৰ আহ্বান জনাইছে বিশেষজ্ঞসকলে।
