যোৱা ২৪ অক্টোবৰত টী২০ বিশ্বকাপত পাকিস্তানৰ বিৰুদ্ধে শোচনীয় ভাৱে পৰাস্ত হ’ল ভাৰতীয় ক্ৰিকেট দল। ভাৰতীয় দল পৰাস্ত হোৱাৰ পিছৰে পৰা মহম্মদ ছামীক ছচিয়েল মিডিয়াত একাংশই আক্ৰমণৰ লক্ষ্য কৰি লৈছে।
ক্ৰিকেটাৰ মহম্মদ ছামীক একাংশ ধৰ্মান্ধ আৰু ক্ৰীড়াৰ মূল্য বুজি নোপোৱা এচাম সাময়িক অনুগামীয়ে ইণ্টাৰনেটত অশালীন মন্তব্যৰে আক্ৰমণ কৰাৰ লগতে দেশ এৰি পাকিস্তানলৈ যাবলৈও ভাবুকি দিয়ে।
এই সময়ত পাকিস্তানৰ উইকেটকীপাৰ বেটছমেন মহম্মদ ৰিজৱান ছামীৰ পক্ষত থিয় হৈছে। উল্লেখ্য যে ভাৰতৰ বিৰুদ্ধে ক্ৰিকেট মেচখনত ৰিজৱানে পাকিস্তানৰ জয়ত অন্যতম ভূমিকা লৈছিল।
মহম্মদ ছামীক সমৰ্থন কৰি ৰিজৱানে ছচিয়েল মিডিয়াত মহম্মদ ছামীক আক্ৰমণ কৰাসকলক সমালোচনা কৰিছে।
ৰিজৱানে এটা টুইটৰ জৰিয়তে ছামীক সমৰ্থন কৰি কয়,”যিধৰণৰ চাপ, সংঘৰ্ষ আৰু ত্যাগ এগৰাকী খেলুৱৈয়ে নিজৰ দেশ আৰু নিজৰ মানুহৰ বাবে খেলৰ জৰিয়তে কৰিব লাগে,সেয়া অনুমানো কৰিব নোৱাৰি।”
তেওঁ লগতে কয়, “মহম্মদ ছামী এজন ষ্টাৰ আৰু বিশ্বৰ শ্ৰেষ্ঠ বলাৰসকলৰ অন্যতম।অনুগ্ৰহ কৰি নিজৰ ষ্টাৰক সন্মান কৰক।এই খেলে মানুহক ওচৰ চপাই অনা উচিত, বিভাজন অনা হ’ব নালাগে।’’
The kind of pressure, struggles & sacrifices a player has to go through for his country & his people is immeasurable. @MdShami11 is a star & indeed of the best bowlers in the world
Please respect your stars. This game should bring people together & not divide ’em #Shami #PAKvIND pic.twitter.com/3p70Ia8zxf
— Mohammad Rizwan (@iMRizwanPak) October 26, 2021
যিসময়ত দেশৰে এচাম লোকে দেশৰ হৈ ভাগ লোৱা এজন খেলুৱৈক কটু ব্যৱহাৰেৰে ব্যতিব্যস্ত কৰি তুলিছে, সেই সময়তে শত্ৰু ৰাষ্ট্ৰৰ অভিধা দিয়া পাকিস্তানৰ এজন খেলুৱৈয়ে ভাৰতীয় খেলুৱৈ এজনৰ পক্ষত থিয় দিয়াটোৱে এক মহানুভৱতাৰ উদাহৰণ দাঙি ধৰিছে।
এনে ক্ৰীড়াসুলভ আচৰণৰ বাবে চৰ্চিত হৈ পৰিছে মহম্মদ ৰিজৱান। কেৱল খেল পথাৰত নিজৰ দমনীয় প্ৰদৰ্শনেৰেই নহয়, বাহিৰৰ জীৱনতো নিজৰ এক সু-আচৰণ দাঙি ধৰিলে মহম্মদ ৰিজৱানে।