কৰ’নাৰ তৃতীয় ঢৌৰ আশংকা চলি থকাৰ মাজতে কেৰেলাত এইবাৰ নতুন আতংকৰ ৰূপত আৱিৰ্ভাৱ হৈছে ন’ৰ’ ভাইৰাছ।
ৰাজ্যখনত এতিয়ালৈকে ১৩ জন লোক এই ভাইৰাছত হোৱাৰ কথা নিশ্চিত কৰা হৈছে।
প্ৰথমে পুকড়ে পশু চিকিৎসা মহাবিদ্যালয়ৰ ছাত্ৰাবাসৰ এগৰাকী ছাত্ৰৰ দেহত ন’ৰ’ ভাইৰাছ ধৰা পৰাৰ পিছতে সষ্টম হৈ পৰিছিল কেৰালাৰ স্বাস্থ্য বিভাগ। কেৰালাৰ স্বাস্থ্য মন্ত্ৰী বীণা জৰ্জে ভাইৰাছ বিধৰ সংক্ৰমণ সন্দৰ্ভত উচ্চস্তৰীয় বৈঠকত মিলিত হৈছে।
মন্ত্ৰী গৰাকীয়ে ৰাজ্য খনৰ খোৱাপানীৰ উৎস সমূহত যাতে ভাইৰাছ বিধ মিহলি হ’ব নোৱাৰে তাৰ বাবে সতৰ্ক হ’বলৈ সংশ্লিষ্ট সকলো পক্ষকে নিৰ্দেশ দিছে।কিন্তু কি এই ন’ৰ’ ভাইৰাছ?
ন’ৰ’ ভাইৰাছ হৈছে মানুহৰ পাচনতন্ত্ৰত আক্ৰমণ কৰা এক প্ৰকাৰৰ ভাইৰাছ। এই ভাইৰাছে আক্ৰমণ কৰাৰ পিছতে মানুহ এজনৰ বমি আৰু ডায়েৰিয়া হ’বলৈ ধৰে।
খাদ্য আৰু পানীৰ জৰিয়তেও এই ভাইৰাছ বিয়পি পৰিব পাৰে। তদুপৰি ৰোগীৰ বমি, শৌচ আদিৰ দ্বাৰাও এই ভাইৰাছ বিয়পি পৰে।
ইপিনে চলিত বৰ্ষৰ ছেপ্তেম্বৰ মাহতো কেৰালাত এটা সময়ত সংহাৰৰ সৃষ্টি কৰা নিপা ভাইৰাছৰ পুনৰ আগমন ঘটিছে। নিপা ভাইৰাছত আক্ৰান্ত হৈয়ো এজন কিশোৰৰ মৃত্যু ঘটিছে।
যোৱা ৩ ছেপ্টেম্বৰৰ পৰা কোঝিকোডৰ বাসিন্দা কিশোৰজনৰ দেহত বিভিন্ন উপসৰ্গ দেখা দিবলৈ আৰম্ভ কৰিছিল।
চিকিৎসকৰ পৰামৰ্শ মতে পৰীক্ষা-নিৰীক্ষা কৰাৰ পাছক তেওঁৰ নমুনা সংগ্ৰহ কৰি পুনেৰ লেবৰটৰীলৈ প্ৰেৰণ কৰা হৈছিল। তাত এই কিশোৰ নিপা ভাইৰাছত আক্ৰান্ত হোৱা বুলি জনোৱা হৈছিল।
কিশোৰজনক প্ৰথমতে এখন বেচৰকাৰী হাস্পাতালত ভৰ্তি কৰাৰ পাছত এখন মেডিকেল কলেজলৈ স্থানান্তৰিত কৰা হয়। তাতো স্বাস্থ্য উন্নতি নোহোৱাত আন এখন বেচৰকাৰী হাস্পাতালত ভৰ্তি কৰোৱা হয় যদিও তাতো কোনো আৰোগ্য লাভ নহ’ল আৰু কিশোৰজনৰ মৃত্যু হয়।
কেৰেলাত বৰ্তমান কৰ’না পৰিস্থিতি অত্যন্ত উদ্বেগজনক হৈ দেখা দিছে। তাৰ মাজতে ন’ৰ’ তথা নিপা ভাইৰাছৰ আৱিৰ্ভাৱে অধিক আতংকৰ সৃষ্টি কৰিছে।
ৰাজ্যখনৰ স্বাস্থ্য বিভাগে ইতিমধ্যে সতৰ্কতামূলক ব্যৱস্থা গ্ৰহণ কৰিছে।
বিশেষজ্ঞসকলে জানিবলৈ দিয়া মতে বাদুলীৰ জৰিয়তে নিপা ভাইৰাছৰ সংক্ৰমণ ঘটে। ইয়াৰ লক্ষণসমূহো জ্বৰ কাহ, মূৰৰ বিষ, ডিঙিৰ বিষ, বমি, উশাহ লোৱৰ সমস্যা আদি। সঠিক সময়ত ৰোগ ধৰা নপৰিলে বা চিকিৎসা নাপালে ৰোগীৰ মৃত্যুৰ আশংকা থাকি যায়।
উল্লেখ্য যে ২০১৮ত প্ৰথম কেৰেলাৰ কোঝিকোডত নিপা ভাইৰাছৰ আক্ৰান্তৰ খৱৰ পোৱা গৈছিল। সেই বৰ্ষত ১৭জন লোকৰ মৃত্যু ঘটিছিল।
