মধ্যকালীন নিৰ্বাচনত ডেম’ক্ৰেট দলৰ হাতত লজ্জাজনক পৰাজয়ৰ সন্মুখীন হ’বলগীয়া হয় ট্ৰাম্পৰ ৰিপাব্লিকান পাৰ্টি। এই পৰাজয়ৰ পিছত দেওবাৰে পুনৰ সৰৱ হৈছে আমেৰিকাৰ ৰাষ্ট্ৰপতি ড’নাল্ড ট্ৰাম্প।
এই ফলাফলক তেওঁ নিজৰ ছ’চিয়েল মিডিয়া একাউণ্টত আমেৰিকাৰ ইতিহাসৰ আটাইতকৈ ডাঙৰ পৰাজয় বুলি অভিহিত কৰে। ডেম’ক্ৰেটসকলক কটাক্ষ কৰি তেওঁৰ অংগীকাৰ, ‘আমি আৰু শক্তিশালী হৈ উভতি আহিম।’
মধ্যকালীন নিৰ্বাচনত ডেম’ক্ৰেটৰ হাতত হোৱা বিশাল পৰাজয়ৰ পিছত দেওবাৰে ট্ৰাম্পে এই বিষয়টোৰ ওপৰত মুখ খুলিছে। নিজৰ ছ’চিয়েল মিডিয়া প্লেটফৰ্ম ট্ৰুথত লিখিছে, ‘নিৰ্বাচনৰ ফলাফল আমেৰিকাৰ ইতিহাসৰ আটাইতকৈ ডাঙৰ পৰাজয়। আনকি ট্ৰাম্পৰ দিনত ৰকেটৰ গতিৰে দৌৰি থকা শ্বেয়াৰ বজাৰখনেও এদিনতে ৩ ট্ৰিলিয়ন ডলাৰ লোকচানৰ সন্মুখীন হৈছে।’
ইয়াৰ পিছতে আমেৰিকাৰ ৰাষ্ট্ৰপতিয়ে আত্মবিশ্বাসেৰে কয়, ‘ভয় নাখাব, আমি উভতি আহিম, আগৰ তুলনাত আৰু অধিক শক্তিশালী হৈ।’
মন কৰিবলগীয়া যে ৩ নৱেম্বৰত অনুষ্ঠিত হ’বলগীয়া মধ্যকালীন নিৰ্বাচনত ডেম’ক্ৰেটসকলে হাউছ অৱ ৰিপ্ৰেজেণ্টেটিভ আৰু চেনেট দুয়োটাৰে নিয়ন্ত্ৰণ দখল কৰিছে। ৰাষ্ট্ৰপতি ট্ৰাম্পে ৰিপাব্লিকান প্ৰাৰ্থীৰ হৈ সক্ৰিয়ভাৱে প্ৰচাৰ চলাইছিল। ভোটাৰসকলৰ প্ৰতি তেওঁৰ আবেদন আছিল যে তেওঁলোকে এই নিৰ্বাচনক ৰাষ্ট্ৰপতি নিৰ্বাচন হিচাপে চাব লাগে। ফলত নিৰ্বাচনৰ ফলাফল ট্ৰাম্পৰ বাবে এক ডাঙৰ ৰাজনৈতিক আঘাত হিচাপে বিবেচিত হৈছে।
নিৰ্বাচনৰ ফলাফলৰ পিছত এই পৰাজয়ৰ দায়িত্ব ট্ৰাম্পে এৰাই চলিছিল যদিও তেওঁ কয়, ‘বেলটত মোৰ নাম নাছিল। যদি থাকিলেহেঁতেন তেন্তে আমি বৃহৎ ব্যৱধানত জয়ী হ’লোহেঁতেন৷’
অৱশ্যে ফক্স নিউজৰ সৈতে হোৱা এক সাক্ষাৎকাৰত পিছত ট্ৰাম্পে নিৰ্বাচনৰ ফলাফলত আচৰিত হোৱাৰ কথা প্ৰকাশ কৰি কয়, “মই ভাবিছিলো যে আমি ভাল কৰিম। হাজাৰ হাজাৰ লোক ৰেলীলৈ আহিছিল, বহুতেই ভিতৰত সোমাব পৰা নাই।”
