বৃহস্পতিবাৰৰ পৰা কানপুৰত আৰম্ভ হ’বলগীয়া নিউজিলেণ্ডৰ বিৰুদ্ধে দুখন খেলৰ টেষ্ট শৃংখলাৰ পৰা বাহিৰ হৈছে কে এল ৰাহুল। ভাৰতীয় ক্ৰিকেট নিয়ন্ত্ৰণ ব’ৰ্ডে মঙলবাৰে এক সংবাদ মাধ্যমৰ বিবৃতিত কয় যে আঘাতৰ বাবে কে এল ৰাহুল টেষ্ট শৃংখলাটোৰ পৰা বাদ পৰিছে । সূৰ্যকুমাৰ যাদৱক কে এল ৰাহুলৰ স্থানত দলত যোগ দিয়া হৈছে।
ৰাহুলৰ আঘাত ভাৰতীয় দলৰ বাবে এক মোক্ষম আঘাত। ৰোহিত শৰ্মা, বিৰাট কোহলী, ঋষভ পণ্ট, বুমৰাহৰ দৰে তাৰকা খেলুৱৈ ইতিমধ্যেই দলত অনুপস্থিত। তেনে অৱস্থাত ৰাহুলৰ অনুপস্থিতিয়ে ভাৰতীয় শিবিৰক চিন্তাত পেলাইছে। অৱশ্য প্ৰথমখন টেষ্টত বিশ্ৰাম দিয়া নিয়মীয়া অধিনায়ক কোহলীয়ে মুম্বাইত অনুষ্ঠিত দ্বিতীয় খন টেষ্টত ভাৰতীয় দলত যোগ দিব।
“ভাৰতীয় দলৰ বেটাৰ কে এল ৰাহুলে তেওঁৰ বাওঁ উৰুত পেশীৰ চাপৰ সন্মুখীন হৈছে আৰু নিউজিলেণ্ডৰ বিৰুদ্ধে আগন্তুক ২ খন খেলৰ Paytm টেষ্ট শৃংখলাৰ পৰা বাহিৰ হৈছে। অহা মাহত দক্ষিণ আফ্ৰিকাৰ বিৰুদ্ধে শৃংখলাৰ প্ৰস্তুতিৰ বাবে তেওঁ এতিয়া NCA ত যোগ দিব। সৰ্বভাৰতীয় জ্যেষ্ঠ বাছনি সমিতিয়ে শ্ৰীযুত সূৰ্যকুমাৰ যাদৱক কে এল ৰাহুলৰ স্থানত বাচনি কৰিছে।” বিচিচিআইয়ে এক সংবাদ মাধ্যমৰ বিবৃতিত কয়।
উল্লেখ্য যে ইংলেণ্ড ভ্ৰমণ কৰা ভাৰতৰ টেষ্ট দলৰ অংশ আছিল সূৰ্যকুমাৰ যাদৱ। অৱশ্যে শৃংখলাটোত ভাৰতীয় দলৰ হৈ অভিষেক ঘটাবলৈ সক্ষম হোৱা নাছিল।
অপেনাৰ ৰাহুল বাদ পৰাৰ লগে লগে মিডল অৰ্ডাৰৰ বিকল্প হিচাপে দলত থকা শুভমন গিলে এতিয়া মায়াংক আগৰৱালৰ সৈতে দলৰ ইনিংছ আৰম্ভ কৰাটো নিশ্চিত হৈছে। আনহাতে শ্ৰেয়স আয়াৰ আৰু সূৰ্যকুমাৰ যাদৱৰ মাজৰ এজনে বৃহস্পতিবাৰে ভাৰতীয় দলৰ হৈ আত্মপ্ৰকাশ কৰাৰ সুযোগ পাব।
ভাৰতীয় টেষ্ট দলঃ আজিংক্য ৰাহানে (অধিনায়ক), মায়াংক আগৰৱাল, চেতেশ্বৰ পূজাৰা (উপ-অধিনায়ক), শুভমন গিল, শ্ৰেয়স আয়াৰ, সূৰ্যকুমাৰ যাদৱ, ঋদ্ধিমান সাহা (উইকেট-ৰক্ষক), কে এছ ভৰত (উইকেট-ৰক্ষক), ৰবীন্দ্ৰ জাদেজা, আৰ অশ্বিন, অক্সৰ পেটেল, জয়ন্ত যাদৱ, ইশান্ত শৰ্মা, উমেশ যাদৱ, মহম্মদ চিৰাজ, প্ৰসিধ কৃষ্ণ।
