চিকিৎসা বিজ্ঞান মহাবিদ্যালয়ৰ চৌহদৰ ভিতৰত আয়োজিত নৱাগত আদৰণি সভাৰ কাৰ্যসূচীত অংশগ্ৰহণ কৰি কৰ’ণাত আক্ৰান্ত হ’ল চিকিৎসা বিদ্যাৰ্থী আৰু কৰ্মচাৰীসহ প্ৰায় ১৮২ জন ব্যক্তি। এই ঘটনা সংঘটিত হয় কৰ্ণাটকৰ ধাৰৱাদৰ এচ ডি এম মেডিকেল কলেজত।
গুৰুত্বপূৰ্ণ কথাটো হৈছে ইয়াৰে অধিকাংশয়েই ক’ভিদ প্ৰতিষেধক গ্ৰহণ কৰিছিলে আৰু ক’ভিদৰ কোনো লক্ষণ তেওঁলোকৰ শৰীৰত দেখা পোৱা নাছিল।
কিছুদিন পূৰ্বে আয়োজিত অনুষ্ঠানটোত প্ৰায় ২০০ জন শিক্ষাৰ্থীয়ে উপস্থিত আছিল। “শিক্ষাৰ্থীসকলক সম্পূৰ্ণৰূপে টিকাকৰণ কৰা হৈছিল। ক’ভিদৰ নতুন প্ৰকাৰৰ সংক্ৰমণ হৈছে নেকি পৰীক্ষা কৰিবলৈ আমি জিনোম অনুক্ৰমৰ বাবে কেইটামান নমুনা প্ৰেৰণ কৰিম।” স্বাস্থ্য আয়ুক্ত ডি ৰণদীপে সংবাদ মাধ্যমৰ আগত কয়।
জিলা উপায়ুক্ত নিতেশ পাটিলে জানিবলৈ দিয়া অনুসৰি ইতিমধ্যে শিক্ষানুষ্ঠানখনৰ দুটা হোষ্টেল বন্ধ কৰি দিয়া হৈছে আৰু যিসকল শিক্ষাৰ্থীৰ পৰীক্ষাৰ ফলাফল ঘোষণা হোৱা নাই তেওঁলোকক হোম আইচ’লেশ্যনত ৰখা হৈছে।
সংক্ৰমণ প্ৰতিহত কৰিবলৈ সম্ভৱপৰ সকলো ব্যৱস্থা গ্ৰহণ কৰা হৈছে বুলি উল্লেখ কৰি তেওঁ কয় যে জিলা স্বাস্থ্য বিষয়া আৰু মহাবিদ্যালয়খনৰ পৰিচালনা সমিতিয়েও এই ক্ষেত্ৰত বিহিত পদক্ষেপ গ্ৰহণ কৰিছে।
তদুপৰি পাটিলে উল্লেখ কৰে যে শিক্ষানুষ্ঠান খনৰ ভিতৰতে সংক্ৰমণ সীমিত আছে আৰু ই বাহিৰত বিয়পি পৰা নাই।
