কৃষক আন্দোলনৰ আটাইতকৈ জনপ্ৰিয় মুখ হিচাপে আত্মপ্ৰকাশ কৰা ভাৰতীয় কিষাণ ইউনিয়নৰ ৰাষ্ট্ৰীয় মুখপাত্ৰ ৰাকেশ টিকাইটৰ জনপ্ৰিয়তা দেশৰ বাহিৰতো বিয়পি পৰিছে। লণ্ডনস্থিত স্কোৱেৰড্ ৱাটাৰমেলন কোম্পানীয়ে বছৰি প্ৰদান কৰা ‘২১ শতাব্দীৰ আইকন বঁটা’ৰ চূড়ান্ত তালিকাত অন্তৰ্ভুক্ত হৈছে টিকাইটৰ নাম।
ভাৰতীয় কিষাণ ইউনিয়নৰ উত্তৰ প্ৰদেশৰ উপ-সভাপতি ৰাজবীৰ সিঙে জানিবলৈ দিয়া অনুসৰি এই বঁটাটো ১০ ডিচেম্বৰত প্ৰদান কৰা হ’ব।
এই বঁটা সন্দৰ্ভত টিকাইটক সাংবাদিকে কৰা প্ৰশ্নৰ উত্তৰত টিকাইটে কয়, “মই বঁটা সংগ্ৰহ কৰিবলৈ লণ্ডনলৈ নাযাওঁ। মই এতিয়া আন্দোলনত ব্যস্ত।” যেতিয়া কৃষকসকলৰ দাবী মানি লোৱা হ’ব তেতিয়া তেওঁ এই বঁটা গ্ৰহণ কৰিব বুলি মন্তব্য কৰে টিকাইটে।
এইয়া অনস্বীকাৰ্য যে কৃষক আন্দোলনৰ সফলতাত টিকাইটৰ সুদক্ষ আৰু আপোচকামী নেতৃত্বৰ যথেষ্ট গুৰুত্ব আছে। আপোচকামী, নিৰ্ভয় আৰু সবল যুক্তিৰে টিকাইট সৰ্বজনবিদিত হৈ পৰিছিল।
উল্লেখ্য যে সুদীৰ্ঘ এবছৰীয়া কৃষক আন্দোলনৰ ফলশ্ৰুতিত যোৱা ১৯ নৱেম্বৰত প্ৰধানমন্ত্ৰী শ্ৰী নৰেন্দ্ৰ মোদীয়ে তিনিওখন বিতৰ্কিত কৃষি আইন প্ৰত্যাহাৰ কৰাৰ কথা ঘোষণা কৰিছিল। ইতিমধ্যে দুই সংসদত কৃষি আইন বাতিল বিধেয়ক গৃহীত হৈছে।
ইয়াৰ পিছতো কৃষকসকলৰ আন্দোলন এতিয়াও শেষ হোৱা নাই। নিম্নতম সমৰ্থন মূল্য, ৭০০ ৰো অধিক শ্বহীদ কৃষকৰ পৰিয়ালক ক্ষতিপূৰণ প্ৰদান তথা আন কিছু দাবীত প্ৰতিবাদ অব্যাহত ৰাখিছে কৃষক সকলে।
ইতিমধ্যে এই বিষয়ত চৰ্চাৰ বাবে কেন্দ্ৰীয় চৰকাৰে কৃষক সকলৰ পৰা পাঁচজনীয়া পেনেলৰ আহ্বান জনাইছে। কৃষক আন্দোলনৰ নেতৃত্বই চৰকাৰৰ আহ্বানৰ প্ৰতি সঁহাৰি জনাই কৃষক নেতাৰ নাম বাচনি কৰাৰ সিদ্ধান্ত লৈছে।
