Wrong policy of the Assam Govt. পুনৰ পোহৰলৈ আহিছে ৰাজ্য চৰকাৰৰ এক ভুল নীতি! যি নীতিয়ে বিশেষকৈ বিপদত পেলাব পাৰে আৰক্ষী বিভাগক! কি এই ভুল নীতি? জানিবলৈ শেষলৈকে পঢ়ক আমাৰ এই এক্সক্লুচিভ প্ৰতিবেদন।
চলিত বৰ্ষৰ ৮ চেপ্তেম্বৰ; ৰাজ্য চৰকাৰৰ গৃহ বিভাগ আৰু ৰাজহ বিভাগে লোৱা এক সিদ্ধান্ত অনুসৰি পশু চিকিৎসা বিভাগৰ যুটীয়া আয়ুক্তৰ কাৰ্য্যালয় চৌহদত নতুনকৈ নিৰ্মাণ হ’ব আৰক্ষী আয়ুক্তৰ কাৰ্য্যালয়। তাৰ বাবে ৰাজহ বিভাগে ইতিমধ্যে ভূমি আৱন্টন দিয়াও পৰিলক্ষিত হৈছে।
উল্লেখযোগ্য যে, ব্ৰহ্মপুত্ৰৰ দুয়োপাৰৰ সৌন্দৰ্য্যবৰ্ধনৰ বাবে কামাখ্যাৰ পৰা উজানবজাৰৰ ৰাজভৱনলৈকে সকলো গৃহ বা চৰকাৰী কাৰ্য্যালয় খালী কৰিবলৈ উচ্চ ন্যায়ালয়ে এক নিৰ্দেশনা দিছিল।
Also Read: কোভিডে কাঢ়ি নিলে দেশৰ এগৰাকী বিশিষ্ট সাংবাদিক বিনোদ দুৱাৰ প্ৰাণ
সেই অনুসৰি চৰকাৰী কাৰ্য্যালয় বিশেষকৈ গুৱাহাটী পৌৰ নিগমৰ আয়ুক্ত কাৰ্য্যালয়, মহানগৰ আৰক্ষী আয়ুক্তৰ কাৰ্য্যালয়, কামৰূপ মহানগৰ জিলা উপায়ুক্তৰ কাৰ্য্যালয়, কামৰূপ মুখ্য ন্যায়িক দণ্ডাধীশ আদালত স্থানান্তৰ কৰাৰ বাবে ইতিমধ্যে পদক্ষেপ হাতত লৈছে চৰকাৰে।
কিন্তু তাত যেন ৰৈ গ’ল এক প্ৰশ্নবোধক!
গুৱাহাটীৰ খানাপাৰাস্থিত জৈৱিক উৎপাদন প্ৰতিষ্ঠান। এইটো উত্তৰ পূৰ্বাঞ্চলৰ একমাত্ৰ প্ৰতিষ্ঠান য’ত বেক্টেৰিয়েল আৰু ভাইৰেল ভেকচিন উৎপাদন কৰা হয়।
Also Read: গুৱাহাটীৰ বিশিষ্ট ব্যৱসায়ী অভিজিৎ গোস্বামীৰ ৰহস্যজনক ‘আত্মহত্যা’
এনথাক্স ভেকচিনৰ উৎপাদন হয় এই গৱেষণাগাৰত। যদি কিবা কাৰণত এই বীজাণু বতাহত এৰি দিয়া হয় তেতিয়াহ’লে সংক্ৰমণ বিস্তাৰিত কৰিব পাৰে বুলি গৱেষণাত প্ৰকাশ পাইছে।
কিন্তু এই প্ৰতিষ্ঠানৰ পৰা ৫০ মিটাৰতকৈয়ো কম দুৰত্বত আৰক্ষী আয়ুক্ত কাৰ্য্যালয় নিৰ্মাণ কৰা হ’ব।
সম্ভাৱ্য দুৰ্ঘটনামূলক পৰিস্থিতি নিয়ন্ত্ৰণ ৰণনীতিৰ পৰিকল্পনা অনুসৰি এনেধৰণৰ উৎপাদন-গৱেষণা প্ৰতিষ্ঠানৰ ভৱনৰ চৌপাশে প্ৰায় ৫০ মিটাৰ মুকলি ঠাই ৰখাৰ পোষকতা আছে। ইয়াৰোপৰি নিয়ম অনুসৰি প্ৰায় ২০০ মিটাৰ মানৰ ভিতৰত কোনো নিৰ্মাণ কাৰ্য্য চলাব নোৱাৰে।
এই সন্দৰ্ভত আমাৰ সাংবাদিকৰ সৈতে হোৱা কথা বতৰাত পশু পালন আৰু চিকিৎসা বিভাগৰ যুটীয়া আয়ুক্ত ড০ শশীৰাম মালাকাৰে কয়, “অতি সংবেদনশীল প্ৰতিষ্ঠানৰ ওচৰত এনে এটা কাৰ্য্যালয় প্ৰতিষ্ঠা কৰাটো যুক্তিসংগত নহয়। কোৱা হয় চীনৰ য়ুহান চহৰৰ এটা গৱেষণাগাৰৰ পৰাই উৎপত্তি হৈছিল মাৰাত্মক কোভিড-১৯ ভাইৰাছ। যি নেকি সমগ্ৰ বিশ্বতে আজিও ত্ৰাসৰ সৃষ্টি কৰি আছে।‘’
Also Read: অসম চৰকাৰে ঘোষণা কৰিলে ২০২১ চনৰ ‘অসম সৌৰভ’ আৰু ’অসম গৌৰৱ’ বঁটা, তালিকাত কাৰ কাৰ নাম?
এই গৱেষণাগাৰৰ পৰা বেক্টেৰিয়া বা ভাইৰাছ জনসাধাৰণৰ দেহলৈ বিয়পাৰ সম্ভাৱনা আছে বুলি তেওঁ সন্দেহ প্ৰকাশ কৰাৰ লগতে কয় যে নীতি অনুসৰি উপযুক্ত ভেকচিন প্ৰস্তুতৰ ক্ষেত্ৰতো বাধাৰ সন্মুখীন হ’ব পশুপালন বিভাগ। যি বিশেষকৈ মহানগৰ আৰক্ষীৰ জীৱনৰ প্ৰতিও ভাবুকি আনিব পাৰে বুলি তেওঁ সন্দেহ প্ৰকাশ কৰে।
ইপিনে, চৰকাৰলৈ আহ্বান জনাই এই স্থানৰ পৰিৱৰ্তে অন্য স্থানত আৰক্ষী আয়ুক্তৰ কাৰ্য্যালয় স্থাপন কৰিবলৈ কয় যুটীয়া সঞ্চালকগৰাকীয়ে।
আনহাতে, এই সন্দৰ্ভত মুখ্যমন্ত্ৰী ড০ হিমন্ত বিশ্ব শৰ্মালৈ এক পত্ৰ প্ৰেৰণ কৰিছে উৎপাদন প্ৰতিষ্ঠানটোৰ পৰামৰ্শদাতা বিজ্ঞানী তথা মহামাৰী বিজ্ঞানী ড০ ভগৎ লাল দত্তই। তেওঁ পত্ৰৰ জৰিয়তে এই আৰক্ষী আয়ুক্ত কাৰ্য্যালয় গৱেষণাগাৰটোৰ নিচেই কাষতে স্থাপন কৰিলে সন্মুখীন হ’ব পৰা সমস্যা সন্দৰ্ভত পত্ৰত উল্লেখ কৰে।
Also Read:কথা দিলে মুখ্যমন্ত্ৰীয়ে; ৩১ ডিচেম্বৰত এটাও ল’ৰা মৰিবলৈ নিদিয়ে পথ দুৰ্ঘটনাত
তদুপৰি, আৰক্ষী আয়ুক্তালয়ৰ জৈৱ সুৰক্ষাৰ দিশৰ সম্ভাৱ্য ‘ৰিস্ক’ৰ পুৰ্বানুমান আৰু সেই ৰিস্ক প্ৰশমন ব্যৱস্থাপনাৰ বাবে বিতং অধ্যয়ন, বিশ্লেষণ আৰু পূৰ্ব পৰিকল্পনা নিশ্চিত কৰি ব্যৱস্থা ল’বলৈ মুখ্যমন্ত্ৰীক আহ্বান জনায়।
ইপিনে, এই সন্দৰ্ভত আমি মহানগৰ আৰক্ষী আয়ুক্ত হৰমিত সিঙৰ সৈতে কথা পাতিবলৈ চেষ্টা কৰিছিলো যদিও তেওঁ মন্তব্য প্ৰকাশৰ পৰা বিৰত থাকে।
