ৰাষ্ট্ৰীয় সংবাদ সংস্থা দ্য ইণ্ডিয়ান এক্সপ্ৰেছৰ এক প্ৰতিবেদনত উন্মোচন হোৱা অযোধ্যাৰ ভূমি লেনদেনৰ ঘটনাই এতিয়া দেশৰ ৰাজনীতি তোলপাৰ লগাইছে।
এই ভূমি লেনদেন কাণ্ডত উচ্চতম ন্যায়ালয়ৰ হস্তক্ষেপ বিচাৰিছে কংগ্ৰেছ নেত্ৰী প্ৰিয়ংকা গান্ধী আৰু উত্তৰ প্ৰদেশৰ প্ৰাক্তন মুখ্যমন্ত্ৰী মায়াৱতীয়ে।
বহুজন সমাজ পাৰ্টিৰ মুৰব্বী মায়াৱতীয়ে বৃহস্পতিবাৰে এই কাণ্ডৰ এক উচ্চ পৰ্যায়ৰ তদন্ত দাবী কৰি কয় যে উচ্চতম ন্যায়ালয়ে এই বিষয়ত হস্তক্ষেপ কৰা উচিত আৰু কেন্দ্ৰই উত্তৰ প্ৰদেশ চৰকাৰক এই ভূমি চুক্তিসমূহ বাতিল কৰিবলৈ নিৰ্দেশ দিয়া উচিত।
ইফালে কংগ্ৰেছ নেত্ৰী প্ৰিয়ংকা গান্ধী ভাদ্ৰাই কয় যে উত্তৰ প্ৰদেশ চৰকাৰে অযোধ্যা ভূমি কেলেংকাৰীৰ নিৰ্দেশ দিয়া তদন্তটো চকুত পৰিছে। আমি এই ক্ষেত্ৰত উচ্চতম ন্যায়ালয়ৰ হস্তক্ষেপ দাবী কৰিছো।
এখন সংবাদমেল সম্বোধন কৰি তেওঁ কয় যে উচ্চতম ন্যায়ালয়ে বিষয়টো স্বতঃপ্ৰণোদিতভাৱে বিবেচনা কৰা উচিত আৰু হস্তক্ষেপ কৰা উচিত কিয়নো ন্যায়ালয়ৰ নিৰ্দেশৰ পিছত অযোধ্যাৰ ৰাম মন্দিৰ নিৰ্মাণ কৰা হৈছে।
শাসনাধিষ্ঠিত বিজেপিক লক্ষ্য কৰি তেওঁ অভিযোগ কৰে যে বিজেপিৰ নেতাসকলে লুণ্ঠন কৰিছে আৰু মানুহৰ বিশ্বাসক আঘাত কৰিছে।
কংগ্ৰেছ নেতা ৰাহুল গান্ধীয়ে টুইট কৰি কয়, “হিন্দুয়ে সত্যৰ পথত খোজ কাঢ়ে। হিন্দুত্বই ধৰ্মৰ ছদ্মবেশত লুণ্ঠন কৰে।”
উল্লেখ্য যে ভূমি ৰেকৰ্ডৰ ইণ্ডিয়ান এক্সপ্ৰেছৰ অনুসন্ধানত অযোধ্যাৰ ৰাম মন্দিৰৰ স্থানৰ পৰা ৫ কিলোমিটাৰ ব্যাসাৰ্দ্ধৰ ভিতৰত স্থানীয় বিধায়ক, অযোধ্যাত সেৱা আগবঢ়োৱা বা সেৱা আগবঢ়োৱা আমোলাসকলৰ নিকট আত্মীয় আৰু উচ্চপ্ৰদস্থ বিষয়াকে ধৰি বহু প্ৰভাৱশালী ব্যক্তিয়ে ভূমি ক্ৰয় কৰিছে।
