মাত্ৰ এটা টেক্সট মেচেজ অথবা ফোনকল! আন বিশেষ একো জটিলতা নাই। এটা ফোন কল অথবা মেচেজৰ দ্বাৰাই মুখ্যমন্ত্ৰীৰ প্ৰাৰ্থী নিৰ্বাচিত কৰা হ’ব! তাকো পাঞ্জাৱৰ দৰে এখন সদাচৰ্চিত ৰাজ্যৰ মুখ্যমন্ত্ৰী!
আম আদমী পাৰ্টিৰ মুৰব্বী অৰৱিন্দ কেজৰিৱালে এই ঘোষণা কৰিছে। কাইলৈ কেজৰিৱালৰ দলে পঞ্জাৱ নিৰ্বাচনৰ বাবে মুখ্যমন্ত্ৰীৰ প্ৰাৰ্থী ঘোষণা কৰিব।
সেই অনুসৰি তেওঁ কয় যে এটা নিৰ্দিষ্ট ফোন নাম্বাৰ মুকলি কৰি দিব। নাম্বাৰটোত আম আদমী অৰ্থাৎ সাধাৰণ লোকসকলে পচন্দৰ মুখ্যমন্ত্ৰী প্ৰাৰ্থীজনৰ নাম মেচেজ কৰিব পাৰিব। এই সেৱা ১৭ জানুৱাৰীলৈকে থাকিব বুলি তেওঁ জনাইছে।
কেজৰিৱালে কয় যে আম আদমী পাৰ্টিয়ে পাঞ্জাৱৰ ৩ কোটি জনতাৰ পচন্দ অনুসৰি মুখ্যমন্ত্ৰীৰ প্ৰাৰ্থী প্ৰদান কৰিব।
লগতে পঢ়ক: কৰ’না প্ৰতিৰোধত সহায় কৰিব! কাইলৈ ১কোটি লোকে কৰিব সূৰ্য নমস্কাৰ
ভাৰতৰ ৰাজনৈতিক ইতিহাসত এনেধৰণে মুখ্যমন্ত্ৰীৰ প্ৰাৰ্থী নিৰ্বাচিত কৰাৰ কৌশল প্ৰথমবাৰৰ বাবে ব্যৱহাৰ হৈছে।
বিশ্ব ৰাজনীতিলৈ লক্ষ্য কৰিলে দেখা যায় যে এনেধৰণৰ নিৰ্বাচনী কৌশল ইউৰোপৰ ক্ষুদ্ৰ ৰাজ্য এষ্টোনিয়াত লোৱা হৈছিল। অত্যাধুনিক দেশখনত ২০০৫ চনৰ পৰা ইণ্টাৰনেটযোগে জনপ্ৰতিনিধি নিৰ্বাচন কৰাৰ পদ্ধতি লৈ অহা হৈছে।
উল্লেখযোগ্য যে পঞ্জাৱত ১৪ ফেব্ৰুৱাৰীৰ পৰা ১০ মাৰ্চলৈকে বিধানসভা নিৰ্বাচন অনুষ্ঠিত হ’ব। ৰাজ্যখনৰ ৰাজনৈতিক পৰিস্থিতি নিৰ্বাচনমুখৰ হৈ পৰিছে।
ইতিমধ্যে আম আদমী পাৰ্টিয়ে পঞ্জাৱত শক্তিশালীভাৱে খোপনি পুতিবলৈ সক্ষম হৈছে। ২০১৭ চনৰ নিৰ্বাচনত কংগ্ৰেছ বিজয়ী হৈছিল। কংগ্ৰেছৰ পাছতেই আছিল আম আদমী পাৰ্টি।
এইবাৰো বিজেপিৰ বিশেষ প্ৰভাৱ নথকা এই ৰাজ্যখনত দলটোৱে মুলতঃ কংগ্ৰেছৰ স’তেই নিৰ্বাচনী যুঁজত অৱতীৰ্ণ হ’ব বুলি ঠাৱৰ কৰা হৈছে।
লগতে পঢ়ক: Covid-19 Update: দেশত ভয়ংকৰভাৱে বৃদ্ধি পাইছে দৈনিক সংক্ৰমণৰ হাৰ; পজিটিভিটিৰ হাৰ ১৩শতাংশ অতিক্ৰম
দলটোৰ মুখ্যমন্ত্ৰী প্ৰাৰ্থীক লৈও চৰ্চা অব্যাহত আছে। এইক্ষেত্ৰত আগত আছে সাংসদ ভাগৱত মান। কিন্তু বৰ্তমানলৈকে ভাগৱত মানক প্ৰাৰ্থী হিচাপে ঘোষণা কৰিবলৈ ইতস্ততঃবোধ কৰিছে দলটোৱে। তেওঁৰ উপৰিও কৃষক নেতা বলবীৰ সিং ৰাজেৱালো মুখ্যমন্ত্ৰীৰ সম্ভাৱ্য প্ৰাৰ্থী হিচাপে চৰ্চা লাভ কৰিছে।
আম আদমী পাৰ্টিৰ উপৰিও কংগ্ৰেছেও এতিয়ালৈকে মুখ্যমন্ত্ৰীৰ প্ৰাৰ্থী ঘোষণাৰ পৰা বিৰত আছে। কিন্তু ৰাজনৈতিক বিশ্লেষকসকলে বৰ্তমানৰ মুখ্যমন্ত্ৰী চৰণজিৎ সিং ছান্নীকেই কংগ্ৰেছৰ মুখ্যমন্ত্ৰী হিচাপে প্ৰক্ষেপ কৰা হ’ব বুলি আশা প্ৰকাশ কৰিছে।
