ঘৃণামূলক ভাষণ এক অপৰাধমূলক কাৰ্য। শাসকীয় দলৰ উচ্চ স্তৰৰ লোকসকল এই বিষয়ত কেৱল নীৰৱেই নহয়, ইয়াক প্ৰায় সমৰ্থন কৰিছে।
ঘৃণামূলক ভাষণৰ বৰ্ধিত ঘটনাৰ ওপৰত উদ্বেগ প্ৰকাশ কৰি এই মন্তব্য কৰিছে উচ্চতম ন্যায়ালয়ৰ প্ৰাক্তন ন্যায়াধীশ ৰোহিন্টন নৰিমনে।
তেওঁ লগতে সংসদে ইয়াৰ বাবে দোষীসকলক নিম্নতম শাস্তি দিয়াৰ ব্যৱস্থা সংশোধন কৰিবলৈও পৰামৰ্শ দিয়ে।
“আইনৰ শাসনৰ সাংবিধানিক ভিত্তি” সন্দৰ্ভত মূল ভাষণ প্ৰদান কৰি নৰিমনে কয়, “শেহতীয়াকৈ আমি দেশত যুৱ ব্যক্তি, শিক্ষাৰ্থী, ষ্টেণ্ড-আপ কমেডিয়ান আৰু এনেধৰণৰ লোকসকলক ৰাজদ্ৰোহ আইনৰ অধীনত চৰকাৰক মুক্তভাৱে সমালোচনা কৰাৰ বাবে গোচৰ ৰুজু কৰিছো। এইয়া সঁচাকৈয়ে ঔপনিৱেশিক প্ৰকৃতিৰ আৰু আমাৰ সংবিধানৰ অধীনত ইয়াৰ কোনো স্থান নাই।”
“আনহাতে, সমাজত ঘৃণামূলক ভাষণ দিয়া ব্যক্তি আছে, যি গণহত্যাৰ আহ্বান জনাইছে। অথচ কিছুমান কৰ্তৃপক্ষৰ বাবে এই লোকসকলক গ্ৰেপ্তাৰ কৰিবলৈ যথেষ্ট অনীহা অনুভৱ কৰোঁ।” ভাষণত তেওঁ কয়।
তেওঁ লগতে কয়, “দেশৰ উপ-ৰাষ্ট্ৰপতিয়ে এক ভাষণত ঘৃণামূলক ভাষণ অসাংবিধানিক বুলি উল্লেখ কৰা শুনি আনন্দিত হৈছিলো। ই কেৱল অসাংবিধানিকেই নহয়, ই এক অপৰাধমূলক কাৰ্যও। দুৰ্ভাগ্যবশতঃ যদিও এই ক্ষেত্ৰত এজন ব্যক্তিক তিনি বছৰলৈকে কাৰাদণ্ড দিব পাৰি, এনে কেতিয়াও নহয় কিয়নো কোনো নিম্নতম শাস্তি নিৰ্ধাৰণ কৰা নহয়।”
“যদি আমি সঁচাকৈয়ে আমাৰ সংবিধানত সন্নিবিষ্ট আইনৰ শাসন শক্তিশালী কৰিব বিচাৰো, মই দৃঢ়ভাৱে পৰামৰ্শ দিম যে সংসদে নিম্নতম শাস্তি প্ৰদান কৰিবলৈ এই ব্যৱস্থাবোৰ সংশোধন কৰা উচিত যাতে এই আইনত ঘৃণামূলক ভাষণ দিয়া আনসকলক প্ৰতিৰোধ কৰা হয়।” তেও কয়।
দুৰ্ভাগ্যবশতঃ শাসকীয় দলৰ উচ্চ স্তৰৰ লোকসকল এইক্ষেত্ৰত কেৱল নীৰৱ হৈ থকাই নহয়, ঘৃণামূলক ভাষণক প্ৰায় সমৰ্থন কৰি আছে বুলি নৰিমনে গুৰুত্বপূৰ্ণ মন্তব্য কৰে।
