জম্মু-কাশ্মীৰত অব্যাহত আছে সেনাৰ সন্ত্ৰাসবাদ বিৰোধী অভিযান । আজি ৰাজ্যখনৰ শ্বপিয়ান জিলাত নিৰাপত্তাৰক্ষীৰ অভিযানত এজন সন্ত্ৰাসবাদী নিহত হয়।
দক্ষিণ কাশ্মীৰ জিলাৰ কিলবাল অঞ্চলত উগ্ৰপন্থীৰ উপস্থিতিৰ বিষয়ে নিৰ্দিষ্ট তথ্য লাভ কৰাৰ পিছত নিৰাপত্তা বাহিনীয়ে তালাচী অভিযান আৰম্ভ কৰে বুলি এজন আৰক্ষী বিষয়াই জানিবলৈ দিয়ে।
তেওঁ কয় যে অঞ্চলটোত তালাচীৰ সময়ত উগ্ৰপন্থীসকলে তেওঁলোকৰ ওপৰত গুলী চালনা কৰিছিল। ইয়াৰ প্ৰত্যুত্তৰত সেনা বাহিনীয়ে গুলীচালনা কৰে আৰু এজন উগ্ৰপন্থী নিহত হয়।
অঞ্চলটোত আন এজন সন্ত্ৰাসবাদী এতিয়াও লুকাই আছে বুলি ধাৰণা কৰা হৈছে আৰু সেয়ে অভিযান চলাই থকা হৈছে বুলি আৰক্ষী বিষয়াজনে জানিবলৈ দিয়ে।
উল্লেখ্য যে যোৱা ২২ দিনত জম্মু-কাশ্মীৰত সেনাৰ অভিযানত ১৬ জন সন্ত্ৰাসবাদী নিহত হৈছে।
