দেশত ক্ৰমান্বয়ে ধৰ্ষণৰ ঘটনা বৃদ্ধি পাই থকাৰ সময়তে আজি ৰাজ্যসভাৰ মজিয়াত কেন্দ্ৰীয় মন্ত্ৰী স্মৃতি ইৰাণীয়ে ধৰ্ষণৰ প্ৰসংগত কেগবোৰ বিশেষ মন্তব্য কৰে।
কেন্দ্ৰীয় মহিলা আৰু শিশু উন্নয়ন দপ্তৰৰ মন্ত্ৰী স্মৃতি ইৰাণীয়ে আজি ৰাজ্যসভাত কয় যে প্ৰতিখন বিবাহক ধ্বংসাত্মক আৰু প্ৰতিজন পুৰুষক ধৰ্ষণকাৰী বুলি গৰিহণা দিয়াটো উচিত নহয়।
তেওঁ ভাৰতীয় কমিউনিষ্ট পাৰ্টিৰ সাংসদ বিনয় ভিস্বমৰ এক পৰিপূৰক প্ৰশ্নৰ উত্তৰত এই মন্তব্য কৰে।
কেন্দ্ৰই ঘৰুৱা হিংসা আইনৰ ধাৰা ৩ (যি ঘৰুৱা হিংসাৰ সংজ্ঞা নিৰ্ধাৰণ কৰে) আৰু ভাৰতীয় দণ্ডবিধিৰ ধাৰা ৩৭৫ (যি ধৰ্ষণৰ অপৰাধৰ সংজ্ঞা নিৰূপণ কৰিছে) সন্দৰ্ভত মন্তব্য কৰি ইৰাণীয়ে কয় দেশৰ প্ৰতিজন পুৰুষক ধৰ্ষণকাৰী বুলি গৰিহণা দিয়াটো কেতিয়াও উচিত নহয়। কেন্দ্ৰীয় চৰকাৰে বৈবাহিক ধৰ্ষণক অপৰাধ হিচাপে গণ্য কৰাৰ ক্ষেত্ৰত কোনো স্থিতি গ্ৰহণ কৰিছে নেকি বুলি সাংসদ ভিস্বমে সোধা প্ৰশ্নৰ উত্তৰত ইৰাণীয়ে কয় যে এই বিষয়টো এতিয়া আদালতত বিচাৰাধীন হৈ আছে। বৈবাহিক ধৰ্ষণৰ সন্দৰ্ভত সেয়ে আদালতেই ৰায় দিব
ভাৰতীয় জনতা পাৰ্টিৰ সাংসদ সুশীল মোডীয়ে ৰাজ্যসভাত কয় যে বৈবাহিক ধৰ্ষণক অপৰাধ হিচাপে গণ্য কৰিলে বিবাহৰ সমগ্ৰ প্ৰক্ৰিয়াটোত জটিলতাৰ সৃষ্টি হ’ব।
তেওঁ যুক্তি দি কয় যে পত্নীয়ে কেতিয়া যৌন সম্ভোগৰ বাবে সন্মতি দিছিল, আৰু কেতিয়া তেওঁ সন্মতি প্ৰত্যাহাৰ কৰিছিল সেয়া নিশ্চিত কৰা সম্ভৱ নহয়। উল্লেখ্য বৈবাহিক ধৰ্ষণ সন্দৰ্ভত মোডীয়ে ইৰাণীক উচ্চ ন্যায়ালয়ত চৰকাৰৰ স্থিতি কি হ’ব সেয়া জনাবলৈ নিৰ্দেশ দিছে।
ৰাজ্যসভাত ভাষণ দি ইৰাণীয়ে কয় যে ভিস্বামে জানে যে সদনৰ প্ৰক্ৰিয়াৰ নিয়ম ৪৭ -ক মতে বৈবাহিক ধৰ্ষণ নিষিদ্ধ কৰে। দিল্লী উচ্চ ন্যায়ালয়ে ভাৰতীয় দণ্ডবিধিৰ ৩৭৫ ধাৰাৰ অধীনত ধৰ্ষণ আইনৰ আওতাত এই বিষয়টো পৰ্যালোচনা কৰি আছে।
উল্লেখ্য ১২ জানুৱাৰীত আদালতক এক লিখিত নথিৰ জৰিয়তে কেন্দ্ৰই কৈছিল যে বৈবাহিক ধৰ্ষণৰ অপৰাধকৰণে “অসৎ উদ্দেশ্যৰে কৰা মিছা গোচৰৰ পয়োভৰ বৃদ্ধি কৰিব পাৰে”। বৈবাহিক ধৰ্ষণৰ ক্ষেত্ৰত বেছিভাগ পৰিস্থিতিজনিত আৰু সমৰ্থনমূলক প্ৰমাণ নাথাকে বুলিও চৰকাৰে উল্লেখ কৰিছিল।
