সদৌ অসম ছাত্ৰ সন্থাৰ সাধাৰণ সম্পাদক শংকৰজ্যোতি বৰুৱাই কয় যে মুখ্যমন্ত্ৰী হিমন্ত বিশ্ব শৰ্মাই কোনোবাদিনা অসমখনকে কৰ্পোৰেটক লীজত দিব পাৰে।
অলপতে তিনিটা কৰ্পোৰেটক ৰে’লৱেৰ মাটি লীজত দিয়া বিষয়টো সমালোচনা কৰি বৰুৱাই কয়,’’গুৱাহাটীৰ সম্পূৰ্ণ জংঘলৰ ভিতৰত পৰি থকা বৃহৎ অঞ্চলৰ ভূমি ৰাজ্যৰ বাহিৰৰ ব্যৱসায়ীক পানীৰ দৰত দিয়া হৈছে। ইয়াত কোনো এক বৃহৎ অভিসন্ধি আছে।‘’
তেওঁ লগতে কয় যে হিমন্ত বিশ্ব শৰ্মাৰ নেতৃত্বৰ অসম চৰকাৰে কেন্দ্ৰীয় চৰকাৰৰ শ্ৰূতলিপি মতে মহানগৰীৰ গুৱাহাটী ক্লাবৰ ১৮ বিঘা আৰু পল্টন বজাৰৰ সমীপত ৪০ বিঘাতকৈয়ো অধিক মাটি তিনিজন কৰ্পোৰেট ব্যৱসায়ীক মাত্ৰ ১০০কোটি টকাৰ বিনিময়ত গতাই দিছে।
লগতে পঢ়ক: বোকাখাতত চাঞ্চল্যকৰ ঘটনা: বোৱাৰীয়েকৰ দা’ৰ ঘাপত গুৰুতৰভাৱে আহত বৰজনাক
তেওঁ দাবী কৰে, ‘’ব্যৱসায়ীকেইজনে ইয়াত গঢ়ি তুলিবলগীয়া অট্টালিকাসমূহকে বিজেপিৰ উন্নয়ন হিচাপে দেখুওৱাৰ এক ব্লু-প্ৰিন্ট ৰচনা কৰিছে।‘’
আছুৰ সাধাৰণ সম্পাদকগৰাকীয়ে লগতে কয় যে বিজেপি নেতৃত্বৰ চৰকাৰখনৰ এই কামবোৰৰ বিৰোধ হোৱা উচিত কিয়নো ই অসমৰ অস্তিত্বলৈ ভাবুকি আনিব।
‘’আমি অসমীয়া লোকসকলে বিজেপিৰ বিৰোধিতা কৰা উচিত, নহ’লে কোনোবাদিনা হিমন্ত বিশ্ব শৰ্মাই অসমখনকে কৰ্পোৰেটৰ হাতত ৯৯বছৰৰ লীজত দিব পাৰে,’’-তেওঁ কয়।
