‘বেটী বচাও, বেটী পঢ়াও’ শ্ল’গান এতিয়া ধোঁৱাচাঙত। দেশৰ বেটী অৰ্থাৎ কন্যা সকলৰ বিৰুদ্ধে এতিয়া নিতৌ বৃদ্ধি পাইছে অপৰাধমূলক ঘটনা। দেশৰ যিকোনো প্ৰান্ততে নিতৌ ধৰ্ষণৰ বলি হ’বলগীয়া হৈছে কন্যা সকল।
শেহতীয়াকৈ গুজৰাটৰ কচ্ছ জিলাত দলবদ্ধ ধৰ্ষণৰ বলি হৈছে এগৰাকী ১৭ বছৰীয়া কিশোৰী। কিশোৰীগৰাকীক অপহৰণ কৰি নিয়াৰ পাছত প্ৰথমে বলপূৰ্বক সুৰা পান কৰাই দলবদ্ধভাৱে বলাৎকাৰ কৰাৰ অভিযোগ উত্থাপন হৈছে।
দেওবাৰে গুজৰাট আৰক্ষীয়ে এই ঘটনা সন্দৰ্ভত চাৰিজন অভিযুক্তক গ্ৰেপ্তাৰ কৰিছে।
আৰক্ষীৰ মতে বলাৎকাৰৰ পূৰ্বে কিশোৰীগৰাকীক দেশীয় সুৰা সেৱন কৰিবলৈ বাধ্য কৰা হৈছিল।
কিশোৰীগৰাকীৰ অভিযোগৰ ভিত্তিত হুছেইন ককাল (৩৫), ৰাহুল সাথৱাৰা (১৯), ভালজী বধিয়াৰা (২৪) আৰু মহেশ্বৰী (২০) নামৰ চাৰিজন যুৱকক আৰক্ষীয়ে গ্ৰেপ্তাৰ কৰিছে।
আৰক্ষীয়ে জানিবলৈ দিয়া মতে ১৬ মাৰ্চত এই নৃশংস ঘটনা সংঘটিত হৈছিল আৰু কিশোৰীগৰাকীক পিছদিনা অচেতন অৱস্থাত পৰি থকা অৱস্থাত স্থানীয় লোকে উদ্ধাৰ কৰিছিল।
কিশোৰীগৰাকীক এনে মুমূৰ্ষু অৱস্থাত উদ্ধাৰ কৰাৰ পিছত স্থানীয় লোকে ততাতৈয়াকৈ এখন চিকিৎসালয়লৈ লৈ যায়।
আৰক্ষীৰ ভাষ্য অনুসৰি কিশোৰী গৰাকী এজন বন্ধুৰ সৈতে ফাৰ্মলৈ গৈছিল আৰু তাৰ পিছত তাইক সুৰা সেৱন কৰিবলৈ বাধ্য কৰা হৈছিল।
চিকিৎসালয়ত ভৰ্তি কৰোৱাৰ পিছত কিশোৰীগৰাকীয়ে আৰক্ষীৰ সন্মুখত ধৰ্ষণকাৰী এজন যুৱকৰ কথা ব্যক্ত কৰি পুনৰ মূৰ্ছা যায়।
অৱশ্যে কিশোৰীগৰাকীয়ে আৰোগ্য লাভ কৰাৰ পিছত তেওঁৰ অভিযোগৰ পিছত আৰক্ষীয়ে চাৰিজন সন্দেহজনক লোকক গ্ৰেপ্তাৰ কৰে।
চাৰিজন অভিযুক্তৰ বিৰুদ্ধে আৰক্ষীয়ে ভাৰতীয় দণ্ডবিধিৰ ৩৬৬, ৩২৮, ৩৭৬ আৰু ১১৪ ধাৰাৰ আৰু লগতে যৌন অপৰাধৰ পৰা শিশুৰ সুৰক্ষা (পকচো) আইনৰ অধীনত গোচৰ ৰুজু কৰিছে বুলি এগৰাকী আৰক্ষী বিষয়াই জানিবলৈ দিয়ে।
