উত্তৰাখণ্ডৰ শেহতীয়া নিৰ্বাচনত কংগ্ৰেছ প্ৰাৰ্থীৰ হাতত পৰাজিত হোৱাৰ পিছতো প্ৰাৰ্থী পুষ্কৰ সিং ধামিকেই ৰাজ্য খনৰ মুখ্যমন্ত্ৰী পদত পুনৰ বহুৱাবলৈ সিদ্ধান্ত লৈছে বিজেপিয়ে।
ৰাজ্য খনৰ খটিমা সমষ্টিৰ পৰা শেহতীয়াকৈ নিৰ্বাচনত পৰাজিত হোৱা উত্তৰাখণ্ডৰ বৰ্তমানৰ মুখ্যমন্ত্ৰী পুষ্কৰ সিং ধামিক দলৰ বিধায়িনী গোটৰ নেতা হিচাপে নিৰ্বাচিত কৰা হৈছে। ফলত পুষ্কৰ সিং ধামীয়েই পৰৱৰ্তী কাৰ্যকালৰ বাবে মুখ্যমন্ত্ৰী হিচাপে বাহাল থকাটো নিশ্চিত হৈ পৰিল।
অহা ৬ মাহৰ ভিতৰত ধামিক আন এটা সমষ্টিত নিৰ্বাচনত অংশগ্ৰহণ কৰাৰ সুবিধা দিয়া হ’ব।
প্ৰধানমন্ত্ৰী নৰেন্দ্ৰ মোডীৰ বাসভৱনত অনুষ্ঠিত এখন সভাত ধামিৰ নাম চূড়ান্ত কৰা হৈছিল।
উল্লেখ্য ধামিক কংগ্ৰেছ প্ৰাৰ্থী ভুৱন চন্দ্ৰ কাপৰিয়ে ৬,৫৭৯ টা ভোটৰ ব্যৱধানত পৰাজিত কৰিছিল। ধামীয়ে ৪৪.৮ শতাংশ ভোট অৰ্থাৎ মুঠ ৪১,৫৯৮ টা ভোট লাভ কৰাৰ বিপৰীতে কাপৰিয়ে ৫১.৮৯ শতাংশ অৰ্থাৎ ৪৮,১৭৭ টা ভোট লাভ কৰিছিল।
একপ্ৰকাৰৰ ৰাজনৈতিক অচলাৱস্থাই গা কৰি উঠা উত্তৰাখণ্ডত পুষ্কৰ সিং ধামিক ২০২১ চনৰ জুলাই মাহত নতুন মুখ্যমন্ত্ৰী হিচাবে নিৰ্বাচিত কৰা হৈছিল।
৪৫ বছৰীয়া ধামিয়েই হৈছে উত্তৰাখণ্ডৰ সৰ্ব কনিষ্ঠ মুখ্যমন্ত্ৰী।উত্তৰাখণ্ডৰ কুমাওন অঞ্চলৰ খাটিমা সমষ্টিৰ পৰা ধামিয়ে দুবাৰ একেৰাহে বিজেপিৰ বিধায়ক হিচাবে নিৰ্বাচিত হৈছিল যদিও ওইবাৰ তেওঁ পৰাজিত হয়।
ধামি উত্তৰাখণ্ডৰ একাদশগৰাকী মুখ্যমন্ত্ৰী আছিল।
কেন্দ্ৰীয় প্ৰতিৰক্ষামন্ত্ৰী ৰাজনাথ সিঙৰ অতি ঘনিষ্ঠ হিচাবে পৰিচিত ধামিয়ে ৰাজ্য খনৰ প্ৰাক্তন মুখ্যমন্ত্ৰী ভগত সিং কোছিয়াৰৰ বিশেষ কৰ্তব্যৰত বিষয়া হিচাবেও এসময়ত কাৰ্যনিৰ্বাহ কৰিছিল।
উত্তৰাখণ্ডৰ মুখ্যমন্ত্ৰী তিৰথ সিং ৰাৱাটে পদত্যাগ কৰাৰ পিছত ধামিয়ে ৰাজ্য খনৰ মুখ্যমন্ত্ৰী হৈছিল।
তিৰথ সিং ৰাৱাটে চাৰি মাহো মুখ্যমন্ত্ৰী হিচাপে কাৰ্যকাল সম্পূৰ্ণ কৰিব পৰা নাছিল।
২০২১ চনৰ ১০ মাৰ্চত তিৰথ সিং ৰাৱাটে ত্ৰিবেন্দ্ৰ সিং ৰাৱাটৰ অপসাৰণৰ পিছত উত্তৰাখণ্ডৰ মুখ্যমন্ত্ৰীৰ আসনত বহিছিল।
ত্ৰিবেন্দ্ৰ সিং ৰাৱাটৰ সলনি পাউৰি গাৰোৱালৰ সাংসদ তিৰথক বিজেপিয়ে মুখ্যমন্ত্ৰীৰ আসনত বহুৱাইছিল আৰু নিয়ম মতে ছ’মাহৰ ভিতৰত তেওঁক কোনো বিধানসভা আসনত বিজয়ী কৰাই আনিব লাগিছিল।
কিন্তু বিজেপিৰ ফালৰ পৰা তেনে কোনো প্ৰচেষ্টা চলোৱাই হোৱা নাছিল। ইয়াৰ বিপৰীতে বিজেপিয়ে ধামিক ৰাজ্য খনৰ মুখ্যমন্ত্ৰী পাতিছিল। কিন্তু মাত্ৰ কেইটামান ভোটৰ ব্যৱধানত ধামি এইবাৰ পৰাজিত হয়। তথাপি বিজেপিয়ে ধামিৰ প্ৰতি এতিয়াও বিশ্বাস অক্ষুণ্ণ ৰাখিছে।
