গুৱাহাটী মহানগৰীৰ পাঞ্জাবাৰীস্থিত শ্ৰীমন্ত শংকৰদেৱ কলাক্ষেত্ৰৰ শ্ৰী শ্ৰী মাধৱদেৱ আন্তৰ্জাতিক প্ৰেক্ষাগৃহত ২৪ মাৰ্চৰ সন্ধিয়া মঞ্চস্থ কৰা হয় ‘স্বতন্ত্ৰতা যুঁজৰ সৈনিক হংসনাথ দেৱশৰ্মা’ শীৰ্ষক এখন জীৱনীভিত্তিক নাটক।
নতুন দিল্লীৰ ৰাষ্ট্ৰীয় নাট্য বিদ্যালয়ৰ সহযোগত আৰু গুৱাহাটী মহানগৰীৰ লখৰাস্থিত ডি শৰ্মা কালচাৰলে একাডেমীৰ উদ্যোগত অঞ্জন শৰ্মাৰ ৰচনা-পৰিচালনাৰে মঞ্চস্থ কৰা ‘স্বতন্ত্ৰতা যুঁজৰ সৈনিক হংসনাথ দেৱশৰ্মা’ নাট খনত কামৰূপ (গ্ৰাম্য) জিলাৰ ৰামদিয়াৰ সস্তাৰত ১৯২০ চনৰ ৩০ নৱেম্বৰত জন্মগ্ৰহণ কৰা মুক্তি যুঁজাৰু হংসনাথ দেৱ শৰ্মাৰ জীৱন পৰিক্ৰমাক উপস্থাপন কৰাৰ প্ৰয়াস কৰা হৈছে।
এজাক শিশুৰ দ্বাৰা মঞ্চস্থ কৰা নাট খনত হংস নাথ দেৱ শৰ্মাই কিদৰে ভাৰতৰ স্বাধীনতা সংগ্ৰামত জঁপিয়াই পৰি ১৯৪২ চনত ব্ৰিটিছৰ খাদ্য সমাগ্ৰীৰ নাও নদীত বুৰাই দিছিল, সৰভোগত ব্ৰিটিছ সেনাৰ বিমান ঘাটিত একাংশ স্বাধীনতাকামী লোকে অগ্নিসংযোগ কৰাৰ পিছতে ব্ৰিটিছ আৰক্ষীয়ে কিদৰে হংস নাথ দেৱ শৰ্মাক গ্ৰেপ্তাৰ কৰিছিল আদি কথাবোৰৰ ফুটাই তোলাৰ চেষ্টা কৰা হৈছে।
নাট খন মঞ্চস্থ কৰাৰ পূৰ্বে অনুষ্ঠিত কৰা কৰ্মশালাত মুখ্য প্ৰশিক্ষক হিচাবে অংশগ্ৰহণ কৰে ৰাজীৱ কুমাৰ সাউদে।প্ৰশিক্ষণ প্ৰদান কৰে শিৱপ্ৰসাদ নাথ আৰু ধীৰাজ কুমাৰে।
অঞ্জন শৰ্মাৰ পৰিচালনাৰে অনুষ্ঠিত কৰ্মশালা পৰিচালনাত সহযোগী হিচাবে আছিল বৰ্ণিকা ঘোষ। ‘স্বতন্ত্ৰতা যুঁজৰ সৈনিক হংসনাথ দেৱশৰ্মা’ নাট খনত অভিনয় কৰা শিশু শিল্পীসকল হৈছে ক্ৰমে সঞ্জীৱন,মুনজ্যোতি,মানসী,গাৰ্গী,জয়শ্ৰী,ৰাগবী,ৰিছা,ভাগ্যশ্ৰী,পাৰ্থ প্ৰতীম,মৃণ্ময়, হিমাংশু,ভাৰ্গৱ, জিজ্ঞাসী,মনজিত,এৰিয়াচ,কনময়,সুমন,সঞ্জীৱ,দীক্ষু আৰু লিপিকা।
নাট খনৰ সাজসজ্জা পংখী কাশ্যপৰ, সহযোগী অৰ্পনা দেৱী,ৰূপ সজ্জা,মঞ্চ সামগ্ৰী—শিৱপ্ৰসাদ নাথ,দেৱকান্ত হাজৰিকা,পোহৰ— ডিম্পল ডেকা,আবহ সংগীত—মনদীপ মহন্ত,নৃত্য বৰ্ণিকা ঘোষ,প্ৰচাৰ—জিনু বৰা আৰু সুনীতা নায়ক,দল পৰিচালক— ডঃদিনেশ কলিতা আৰু ধীৰাজ কুমাৰ,সমন্বয়ক— ৰাজীৱ কুমাৰ সাউদ,যাতায়াত—ভবেশ ভূঞা,সহযোগী— শাক্য সিংহ শৰ্মা,অভ্যৰ্থনা—মনোজ কুমাৰ শৰ্মা,ঘোষণা— প্ৰজন্মা চৌধুৰী, পৰিচালনা সহযোগী— প্ৰতীক্ষা শৰ্মা,ব্যৱস্থাপনা—বংকিম তালুকদাৰ, হেমেন কুমাৰ শৰ্মা আদি।
