তামিলনাডুৰ শাসনাধিষ্ঠ আঞ্চলিক ৰাজনৈতিক দল দ্ৰাবিড় মুন্নেত্ৰা কাঝাগম (ডিএমকে)- এ এইবাৰ ৰাষ্ট্ৰীয় ৰাজনীতিত প্ৰৱেশ কৰাৰ যো-জা চলাইছে। ইয়াৰে প্ৰাথমিক পদক্ষেপ হিচাপে দিল্লীত দলটোৰ নতুন কাৰ্যালয় মুকলি কৰে দলৰ শীৰ্ষ নেতা তথা তামিলনাডুৰ মুখ্যমন্ত্ৰী এম কে ষ্টালিনে।
উল্লেখ্য যে লোকসভাত ২৩ জন সাংসদৰ সৈতে ডিএমকে বৰ্তমান নিম্ন সদনৰ তৃতীয় সৰ্ববৃহৎ দল।
কাৰ্যালয় উদ্বোধন কৰি ষ্টেলিনে দলীয় কৰ্মীসকলক দিয়া তেওঁৰ বিবৃতিত কয় যে ডিএমকেৰ এই নতুন কাৰ্যালয় ৰাষ্ট্ৰীয় ৰাজনীতিত এক আকৰ্ষণীয় প্ৰতীক।
দিল্লীত ডিএমকেৰ নতুন কাৰ্যালয় মুকলি কৰাৰ সময়ত কংগ্ৰেছ অধ্যক্ষ ছোনিয়া গান্ধী, সমাজবাদী পাৰ্টিৰ মুৰব্বী অখিলেশ যাদৱ, চিপিআই(এম)ৰ সাধাৰণ সম্পাদক সীতাৰাম য়েচুৰী আৰু নেচনেল কনফাৰেন্সৰ ফাৰুক আব্দুল্লাকে ধৰি বিৰোধী দলসমূহৰ নেতাসকল উপস্থিত থাকে।
তেওঁলোকৰ ওপৰি দেশৰ অন্যতম বিৰোধী দল তৃণমূল কংগ্ৰেছ, টিডিপি, চিপিআই, বিজেডি আৰু এছএডিৰ নেতাসকলো এই কাৰ্যসূচীত উপস্থিত থাকে।
তৃণমূল নেত্ৰী মহুয়া মৈত্ৰ, টিডিপি- ৰ ৰামমোহন নাইডু আৰু কে ৰবীন্দ্ৰ কুমাৰ, চিপিআইৰ ডি ৰাজা, বিজেডিৰ অমৰ পাটনায়ক আৰু এছএডিৰ হৰচিমৰত বাদলেও অনুষ্ঠানটোত অংশগ্ৰহণ কৰিছিল।
শেহতীয়াকৈ ৰাষ্ট্ৰীয় ৰাজনীতিৰ পৰা বিজেপিক প্ৰতিহত কৰাৰ উদ্দেশ্যে এক উমৈহতীয়া ৰাজনৈতিক মঞ্চ গঠন কৰিবলৈ আগবাঢ়িছে বিৰোধী শক্তি। গতিকে ডিএমকে- ৰ এই কাৰ্যসূচীত বিৰোধী দলসমূহৰ নেতৃত্বৰ অংশগ্ৰহণে বিশেষ তাৎপৰ্য বহন কৰিছে।
