ধৰ্মনিৰপেক্ষ ভাৰতত ধৰ্মীয় উগ্ৰতা তথা সাম্প্ৰদায়িকতাৰ দৃশ্য সাধাৰণ হৈ পৰিছে। দেশৰ যিকোনো প্ৰান্ততে এতিয়া নিৰ্দিষ্ট ধৰ্মৰ প্ৰতি মুকলি ভাবুকি সহজাত হৈ পৰিছে।
মুখ্যমন্ত্ৰী যোগী আদিত্যনাথৰ সুশাসন তথা মহিলাৰ সুৰক্ষাৰ কথা কোৱা উত্তৰ প্ৰদেশত এতিয়া মুকলিকৈ আইন তথা সংবিধান উলংঘন কৰি আহিছে এচাম আশীৰ্বাদপুষ্ট হিন্দুত্ববাদী নেতাই।
শেহতীয়াকৈ সামাজিক মাধ্যমত ভাইৰেল হৈ এনে এক সাম্প্ৰদায়িক ভাবুকিৰ মন্তব্য।
প্ৰকাশ পোৱা ভিডিঅ’টোত এজন হিন্দুত্ববাদী ধৰ্মীয় নেতাই মুছলমান সম্প্ৰদায়ৰ মহিলাক অপহৰণ আৰু ধৰ্ষণ কৰাৰ মুকলি ভাবুকি দিয়া স্পষ্টকৈ শুনিবলৈ পোৱা গৈছে।
উত্তৰ প্ৰদেশৰ সীতাপুৰ জিলাত এক সমাৱেশক সম্বোধন কৰি এই হিন্দুত্ববাদী ধৰ্মগুৰুজনে কয়, “এই অঞ্চলৰ ওচৰতে এখন ‘চোঁৱৰ’ৰ গাঁও আছে। যদি সেই গাঁৱৰ কোনোৱে এই অঞ্চলটোৰ কোনো হিন্দু ছোৱালীক হাৰাশাস্তি কৰে, মই তেওঁলোকৰ ঘৰৰ জীয়ৰী-বোৱাৰীক ঘৰৰ পৰা তুলি আনি ধৰ্ষণ কৰিম।”
তেওঁ লগতে মুকলি হত্যাৰ ভাবুকি দি কয়, “এই ‘চোঁৱৰ’বোৰে মোৰ হত্যাৰ বাবে ২৮ লাখ টকা জমা কৰিছে। চোঁৱৰ বোৰে শুনি লোৱা, না এই চোঁৱৰৰ অঞ্চল থাকিব না, চোঁৱৰ থাকিব।”
গেৰুৱা পোচাক পৰিহিত এই ধৰ্মগুৰুজনক খাইৰাবাদ চহৰৰ মহন্ত বজৰং মুনি বুলি চিনাক্ত কৰা হৈছে। ভিডিঅ’টোত দেখিবলৈ পোৱা গৈছে যে বজৰং মুনিৰ এই ঘৃণনীয় বক্তব্যৰ লগে লগে তাত উপস্থিত সমৰ্থকসকলে উল্লাসিত হৈ শ্ল’গান দিয়ে।
উল্লেখ্য যে এই ভিডিঅ’টো ২ এপ্ৰিলত দৃশ্যগ্ৰহণ কৰা হৈছিল। উক্ত সমাৱেশত আৰক্ষীৰ উপস্থিতিও ভিডিঅ’টোত স্পষ্টকৈ দেখিবলৈ পোৱা গৈছে। তৎসত্বেও ধৰ্মগুৰুজনৰ বিৰুদ্ধে কোনো ব্যৱস্থা গ্ৰহণ কৰা নাছিল আৰক্ষীয়ে।
কিন্তু ভিডিঅ’টো ভাইৰেল হোৱাৰ পিছতে সৃষ্টি হোৱা প্ৰতিক্ৰিয়াৰ প্ৰতি লক্ষ্য ৰাখি উত্তৰ প্ৰদেশ আৰক্ষীয়ে এতিয়া তদন্তৰ নিৰ্দেশ দিছে।
সীতাপুৰ আৰক্ষীয়ে টুইট কৰি কয় যে, “অতিৰিক্ত আৰক্ষী অধীক্ষকৰ তদন্ত চলি আছে।তথ্য আৰু প্ৰমাণৰ ওপৰত আধাৰিত কৰি নিয়ম অনুসৰি আইনী ব্যৱস্থা লোৱা হ’ব।”
উল্লেখ্য যে নিজকে আৰ এছ এছ আৰু বিজেপিৰ নেতাৰ ঘনিষ্ঠ বুলি উল্লেখ কৰা এই ধৰ্মগুৰুজনৰ বিৰুদ্ধে পূৰ্বেও ভূ-সম্পত্তিৰ অবৈধ দখলৰ অভিযোগ আছে। কিন্তু ইয়াৰ পিছতো তেওঁৰ বিৰুদ্ধে বৰ্তমানলৈকে কোনো ব্যৱস্থা গ্ৰহণ কৰা হোৱা নাই।
